martes, 1 de septiembre de 2020

Contos por teléfono, unha ledicia

O pasado 26 de agosto, puxéronse en marcha as actividades nas nosas bibliotecas. 
Tendo presente o medo aínda existente, unido a unha das conmemoracións literarias do ano, o centenario do nacemento do pedagogo e escritor italiano Gianni Rodari, deu como resultado a iniciativa, financiada pola Fundación Filomena Rivero Alonso, fundación redondelana que leva xa moitos anos colaborando coas nosas bibliotecas, que levou o nome de Contos por teléfono , en alusión a unha das obras máis coñecidas deste autor. 

 
Ese 26 de agosto os que o desexasen, previa inscrición na biblioteca de Redondela, podían escoitar unha historia por teléfono, dunha duración aproximada de 5 min., na voz da contacontos viguesa Ana Facchini. Estivo dirixida a público de todas as idades, tanto infantil como adulto, e foi unha bonita forma de ir dando entrada ás actividades dun modo absolutamente seguro.


  • Horario establecido de chamadas: de 10 a 14h e de 17 a 21h

  • Horario efectivo de chamadas: de 10 a 14h e de 16,45 a 21,45h

  • Número de chamadas inscritas: 34 chamadas

  • Número de chamadas recibidas: 28 chamadas

  • Número de contos inscritos: 34 contos

  • Número de contos narrados: 41 contos

  • Número de persoas alcanzadas: 69 persoas (talvez incluso máis)

  • Idade dos destinatarios: a actividade estaba pensada “desde os 5 aos 190 anos”; concretamente os participantes foron nenas e nenos entre 2 e 12 anos e adultos dende 27 a 80 anos

  • Duración aproximada das chamadas e contos: unha media de 10 minutos por chamada.

  • Historias e contos narrados: 16 historias diferentes


Tipoloxia da narración


Empregáronse un total de 16 historias diferentes, algunhas narradas máis veces ca outras segundo as sensacións percibidas na interacción inicial cos nenos e as familias.

No caso dos máis pequerrechos, optouse polo xogo, historias simples, pequenos retrousos cantados que invitasen á participación, fórmulas repetitivas, ritmo e vocabulario arredor das temáticas relativas ao seu mundo máis próximo.

Para os cativos entre 8 e 12 anos, sen deixar de procurar a interacción e cunha presenza algo máis tímida das cancións, que caracterizan ás narracións de Ana Facchini, as historias, algo máis complexas no fío argumental, xiraron principalmente arredor do humor e tiveron como temática, presente dun xeito máis ou menos marcado, o coidado do medio ambiente, a relación coa natureza e os seres vivos e lendas sobre as orixes das cousas.

No caso dos adultos, narráronse historias cun ton poético e lírico máis que narrativo, facendo referencia ás relacións humanas e ao significado da propia vida. Noutros casos, as narracións, pensadas inicialmente para un público infantil, cobraron unha dimensión nova aos oídos dos adultos e por suposto, non podían faltar a tradición e o humor, tan necesario nestes tempos.


Acollida

Moitísimas grazas a tod@s os que participastes nestes "Contos por teléfono"!

A acollida foi máis que positiva. Foi unha proposta que xerou moita curiosidade e nese sentido, queremos destacar o feito de que familias enteiras se reunisen arredor do teléfono para compartir as historias, tal como na tradición máis antiga, as comunidades escoitaban historias arredor dunha lareira.


En Radio Redondela

No Faro de Vigo

No Facebook do Concello


No hay comentarios: