O Club de Lectura Fácil rende homenaxe a Jules Verne no Meirande

O Club de Lectura Fácil rende a súa particular homenaxe a Jules Verne nunha sesión extraordinaria que se desenvolveu o pasado venres no Museo Meirande.

Con motivo do 150 aniversario da chegada literaria do submarino Nautilus á enseada de San Simón, o Club de Lectura Fácil, organizado por Andaina Redondela e que conta coa colaboración das Bibliotecas Municipais de Redondela, achegouse ás instalacións do Meirande para desenvolver alí a súa reunión mensual. 

 

  Os mozos puideron gozar dun documental sobre a batalla de Rande e dunha visita guiada polas instalacións e a exposición; acabada a mesma reuníronse para traballar o capítulo da “Baía de Vigo” de 20.000 leguas baixo dous mares nunha recente edición dentro dunha nova colección de Lectura Fácil.

Aquí todas as fotografías da actividade
 

 O Club de Lectura Fácil , que comezou o pasado 27 de abril nas instalacións da biblioteca municipal de Redondela, está destinado a persoas con distintas capacidades lectoras e/ou dificultades de comprensión 

"Zentangleando"

O pasado venres, 7 de setembro, unha ampla representación dos clubs de lectura de Redondela deron inicio a un novo curso coa actividade do programa Ler conta moito da Xunta de Galicia, Caderno de Lectura con Zentangle

O zentangle é un método de debuxo baseado nas formas abstractas, suaves, orgánicas, elegantes e estruturadas. 

Con esta técnica podes crear debuxos moi agradables e elegantes, realmente bonitos sen necesidade de saber debuxar. Ademáis,  permíteche desenvolver a túa creatividade, xa que non existe unha técnica concreta e podes facelo á túa maneira, debuxando formas abstractas que vas enchendo con outras máis pequenas, normalmente repetitivas. O normal é facelo en branco e negro, é dicir, cun bolígrafo ou rotulador negro sobre papel branco (normalmente rectangular). É tan relaxante que adoita considerarse terapéutico.

 Teño que recoñecer que ao principio, a que aquí escribe, era un pouco escéptica (perdóame Elisabet) sobre a posibilidade de que se alcanzasen os obxectivos que Zentangle propón.

 Un pensamento totalmente equivocado, como ben puidemos comprobar todos os que participamos no taller. Non importa como se debuxe (horriblemente mal pola miña banda), o resultado é precioso e, utilizando unas mesmas formas, o resultado é absolutamente persoal e diferente no traballo de cada persoa.

 

Moitas grazas a Carmen por este marabilloso biscoito caseiro que nos trouxo á actividade (o que nos custou esperar ao final para comérnolo pois non podiamos manchar as mans)

Ademais durante o proceso de creación prodúcense unha profunda concentración no que se está elaborando o que leva a un gran descanso mental.

 Agradecemos desde aquí a Elisabet Hillerud, unha das cinco tituladas oficiais de Zentangle en España (a única en Galicia) e ao programa Ler conta Moito, o descubrirnos esta técnica.

 A satisfacción ao final da actividade foi absoluta por parte de todos os que participamos nela.

Os clubs de lectura das bibliotecas municipais inician unha nova tempada con diversas actividades

Os clubs de lectura das Bibliotecas Municipais de Redondela estrean a próxima semana un novo curso. A novidade e a verdadeira importancia está en que despois de tantos anos non só permanecen senón que os grupos de lectura crecen e progresan adecuadamente

Na actualidade hai 3: 2 de adultos e un infantil aos que hai que engadir o Club de Lectura Fácil, este último organizado pola Asociación Andaina Redondela coa colaboración das bibliotecas municipais.

O Club de Lectura Fácil está dirixido a persoas que presentan dificultades na compresión lectora e foi unha das novidades deste ano.

  

 

O 7 de setembro arrinca a nova tempada cunha actividade extraordinaria, o obradoiro " Caderno de lectura con Zentangle", unha actividade na que se utilizará o método zentangle para decorar un caderno de lectura. É unha técnica sinxela que consiste en trazar patróns repetitivos creando belas imaxes e fomentando a tranquilidade e a concentración, desenvolvendo a creatividade e a sensibilidade artística. A actividade encádrase dentro do programa de dinamización lectora Lercontamoito.

O 28 de setembro, o Club de Lectura Fácil levará a cabo a súa reunión mensual no Museo Meirande, unha reunión na que sobrevoará o espírito verniano pois terá como centro a obra "20.000 leguas baixo dos mares", nun ano en que se conmemora os 150 anos da "chegada" do Nautilus á Enseada de San Simón (Redondela).

As persoas interesadas en participar nos clubs de lectura (en calquera das modalidades), poden informarse nas Bibliotecas Municipais e, no caso do Club de Lectura Fácil, na Asociación Andaina Redondela.

Club de Lectura Fácil na biblioteca de Redondela

Disfrutando no Club de Lectura Fácil :)

O pasado venres, 27 de abril, iniciouse o Club de Lectura Fácil, ás 19:30 h., na biblioteca de Redondela. Tras os primeiros momentos, dedicados a que os participantes coñecesen as instalacións e servizos da mesma, comezou a reunión nun clima distendido e alegre. Que ben o pasamos! De feito, o tempo transcorreu tan rápido que non nos fomos ata as 21:00 h. 

Moitas grazas a Andaina Redondela por permitirnos participar nesta estupenda iniciativa 

Organiza, Asociación Andaina Redondela
Colaboran, Bibliotecas de Redondela e Fundación Filomena Rivero Alonso