lunes, 30 de abril de 2012

Un brinde no club de lectura para celebrar o Día do Libro

Cun brinde e moitos sorrisos celebramos o Día do Libro no club de lectura de Chapela.

A xuntanza deste mes estaba adicada a un escritor xaponés de nacemento, mais británico de adopción, Kazuo Ishiguro, considerado, de feito, un dos máis importantes representantes da escrita británica actual. A obra que limos del foi o seu primeiro libro de relatos, publicado no ano 2009: "Nocturnos".
Kazuo Ishiguro

"Nocturnos", subtitulado: "Cinco historias de música e anoitecida", é un conxunto de cinco relatos, localizados en lugares e contextos diferenciados, mais unidos todos eles polo protagonismo vital da música e polo peso que marcan neles os desencontros, o desamor e o outono vital en todos os seus protagonistas.
 
Ánxeles nos agasallou coa rosa de Sant Jordi, que centrou a mesa do debate
















Ainda que os personaxes salientan polo seu amor á música, e por adicar a esta arte grande parte das súas vidas, estas se nos presentan como amargas, serodias e vacías. Seguir o propio camiño e ter vocación pola actividade que se desenvolve non é suficiente para non caer na apatía e na perda da ilusión. Queda tempo para a reflexión sobre outros aspectos da vida nos que, case sen decatarse, son quen de percibir o sabor agridoce do desencanto.
A frustración, o paso do tempo, o arrepentimento, o desengano, as ambicións e os soños non cumpridos, a perda da fe da xuventude... poboan estes relatos cheos de soidade e de nostalxia, pero tamén salferidos de pequenas notas de humor, de situacións absurdas  producto do enxeño narrativo do seu autor.
 Os finais abertos de todas as historias atemperan o dramatismo das mesmas. Lonxe dun ton tráxico e ferinte, as historias acollen unha dor sosegada e máis realista, a que nos envolve cando nos descubrimos que xa non somos novos, a que pode chegar no momento en que deixamos de soñar no futuro e nos plantamos na realidade do presente.

Un libro moi musical e musicado, que tivo poucos partidarios dentro do noso club de lectura. Gustará máis o libro da próxima sesión? De momento, recomendámosvos ler esta reseña sobre o libro.

E, por último, dado que a xuntanza a celebramos no propio 23 de Abril, Día do Libro, nada mellor que celebrar unha data tan especial para todo o club con bombóns e tarta de Santiago. Todos os participantes brindamos entre nós, (e cara aos lectores do blog tamén!) por ler xuntos moitos máis libros de aquí ata a próxima celebración... por un ano cheo de libros!

María José, Mª Carmen, Maribel, Carme, Mercedes, Conchi, Pilar, Tini...
... Carmen, Sonia, Miguel, Pili, Loli, Marcos e Ángela...
Brindando polo Día do Libro, no club de lectura de Chapela

Publicar un comentario