Libros solidarios na Biblioteca de Chapela

Volve a campaña de libros solidarios na Biblioteca de Chapela!

Libros x alimentos: do 12 de novembro ao 14 de decembro, no Multiúsos de Chapela.

En colaboración con Cáritas Redondela a biblioteca pretende facer unha recollida solidaria de alimentos e produtos de hixiene a cambio dos libros e outros documentos que non precisamos para a nosa colección.

O luns 12 de novembro será o comezo. Liberaremos libros e mais outros documentos (películas e música) que expoñeremos nun lugar habilitado no Multiúsos de Chapela. Alí poderedes coller o que vos guste, e deixarnos as vosas aportacións en especie.

Os produtos recollidos serán repartidos por parte do noso colaborador entre as familias que máis os precisen.

Agardamos a vosa participación e adiantámosvos as grazas de todo corazón pola vosa solidariedade. 😃

Recomendámosvos visitar o noso pequeno mercadiño solidario máis dun día, pois irá cambiando cada semana.

O noso rincón solidario está preparado no recibidor de entrada
da planta superior do Multiúsos de Chapela

Campaña solidaria de intercambio de libros por alimentos, nas bibliotecas de Redondela

 As bibliotecas de Redondela impulsan unha campaña de recollida de alimentos e produtos de primeira necesidade que se destinarán a Cáritas Redondela

 Libros solidarios é o lema desta campaña de intercambio de libros por alimentos, na que participan as bibliotecas municipais, a biblioteca do Círculo Cultural Recreativo de Chapela e as bibliotecas dos CEIP de Quintela, Santo Paio de Abaixo, Alexandre Bóveda, Laredo, do CEP Santa Mariña e dos IES Chapela e Mendiño. Todos estos centros son os puntos de intercambio.

 

A campaña dará comezo o venres, 24 de outubro, por ser este o Día da Biblioteca, e rematará o 28 de novembro ou ata que se esgoten as existencias. A iniciativa está aberta a calquera cidadán que quera colaborar e, nos centros de ensino particularmente ás súas comunidades escolares, cambiando alimentos non perecedoiros e produtos de hixiene, tanto persoal como para o fogar, polos libros que encontrarán expostos nos distintos centros de intercambio. Os visitantes collerán o libro ou libros do seu interese e deixarán a cambio os produtos nos recipientes colocados para tal efecto.

 Son colaboradores nesta iniciativa: Biblioteca do CEIP San Salvador de Teis, Fundación Filomena Rivero Alonso e El Patito Editorial. O noso máis agradecido recoñecemento a todos eles e dunha forma especial a Marta (que quere pasar desapercibida) polo marabilloso cartel que realizou con todo o cariño e detalle. Moitas grazas a todos!

(Na fotografía, a presentación da campaña coa presencia das bibliotecarias dos centros participantes e dalgún dos colaboradores)

A campaña foi recollida nestes días no Faro de Vigo.

Campaña de intercambio de libros por alimentos próximamente nas bibliotecas de Redondela

O vindeiro Venres 24 de Outubro, Día da Biblioteca, arrancará nas bibliotecas de Redondela unha campaña coa que as bibliotecas buscaremos recoller alimentos e produtos de primeira necesidade (produtos de hixiene, produtos de coidado infantil) a cambio de libros. 

A campaña parte das Bibliotecas municipais de Redondela e mais da biblioteca do Círculo Cultural Recreativo de Chapela, pero a ela xa se teñen adherido moitas bibliotecas dos centros de ensino do noso Concello.

Próximamente vos diremos cales.

Todos os bens recollidos na campaña serán entregados a Cáritas para a súa distribución entre as familias necesitadas da contorna.

Na vindeira semana, vos contaremos máis sobre esta actividade, facendo un chamamento para que todos vos acheguedes a estas bibliotecas para achegar doazóns aos nosos puntos de intercambio.