Todo #BiblioVeránEnGalicia

21 bibliotecas municipais galegas convidámovos durante estes días a descubrir #BiblioVeránEnGalicia🌞, compartindo con vós as nosas recomendacións de lectura 📚 para animarnos a coñecer o noso entorno máis próximo con recunchos de lectura, paisaxes🌳, tradicións, gastronomía🍲, arte, historia, lendas e moito máis que a terra galega nos pode ofrecer.
Agora, neste vídeo, podedes ver todas as propostas agrupadas.
Bo verán!🌞🌞🌞

#bibliotecasmunicipais
#biblioveranengalicia

#biblioveranengalicia

  
A partir de mañá, 23 de xuño, comezamos unha nova colaboración entre as #bibliotecasmunicipais de Galicia. 

Todos os días (de luns a venres) ás 12:00 h. haberá unha publicación co cancelo #biblioveranengalicia co que cada biblioteca participante dará a coñecer lugares interesantes do seu concello🏞🌅🌉🌌, e tamén libros e outros documentos 📖📜📰📀🎞📸 para coñer mellor cada localidade.

Con esta iniciativa queremos provomer o turismo pola nosa terra durante este verán, animando a coñecer todos os recunchos que aínda nos quedan por descubrir.

Deste xeito queremos aproveitar os lazos establecidos entre as bibliotecas municipais da nosa comunidade durante o confinamento para ofrecer ás persoas usuarias da rede novas propostas conxuntas.

 #biblioveranengalicia

• A nova na web do noso Concello.
• Compartida tamén no Facebook oficial do Concello de Redondela.

Hoxe, as Bibliotecas Municipais de Redondela cumpren 50 anos

21 de setembro de 1968 inaugúrase a Biblioteca P.M. Valle-Inclán de Redondela nos baixos da casa consistorial.

22 de setembro de 1968,  abre as súas portas ao público

 Era alcalde, naqueles anos, D. Pedro Otero Rey.

Esta mañá realizouse na sala infantil da biblioteca redondelana a presentación dun tríptico conmemorativo e das actividades e actos cos que se celebrará e se está a celebrar a efeméride.   
Mergullando polos libros de rexistro daqueles anos atopámonos con que a finais de 1968 eran 325 os socios da biblioteca e 1626 os libros rexistrados. Hoxe en día, e xa dentro do catalogo colectivo da Rede de Bibliotecas Públicas de Galicia, as bibliotecas de Redondela teñen 427.693 usuarios potenciais que poden acceder a un catálogo de 2.971.498 exemplares e 951.883 títulos aos que hai que engadir os dispoñibles na plataforma de préstamo de libros dixitais, Galicia Le.

Dentro dos mesmos destaca a proposta de poñer nome á biblioteca de Chapela, a lectura radiofónica de 20.000 leguas baixo dos mares en conmemoración da chegada literaria do Nautilus á enseada de San Simón, unha charla-coloquio e unha exposición contorna á figura de Jella Lepman, a campaña nas redes sociais #eubibliotecasredondela50 e, a final de ano, unha celebración na que se recoñecerá o apoio dalgunhas entidades ao labor das mesmas.

En ambas bibliotecas festexamos o día agasallando aos usuarios con filmes para levar para a casa. Durante toda a semana, os nosos usuarios poderán gozar deste agasallo.

Pero para agasallos, o que recibimos esta mañá por parte do Concello: o Arquivo Municipal de Redondela obsequiounos con este interesante álbum fotográfico das bibliotecas de Redondela, que podedes consultar aquí ou accedendo á súa páxina de Facebook. Un percorrido fotográfico por algúns momentos destes 50 anos das bibliotecas de Redondela. Un fondo que se vai ir enriquecendo paulatinamente. Moitas grazas!

Moitas grazas a Radio Redondela pola difusión de todas as nosas actividades.

  Tamén a Atlántico Diario e a Faro de Vigo por difundir esta nova.

Visita guiada para nenos por 50 anos das Bibliotecas de Redondela

O próximo 21 de setembro cúmprense 50 anos da inauguración da Biblioteca P. M. Valle-Inclán nos baixos da Casa Consistorial.

Para conmemorar a efeméride as bibliotecas organizamos, este 21 de setembro,  unha visita guiada por Redondela para nenos de 6 a 12 anos, con especial fincapé nos edificios que acolleron á Biblioteca P.M. Valle-Inclán desde o ano 1968 ata os nosos días.

O percorrido estará conducido por Soledad Chayán e terá unha duración aproximada dunha hora. 

 A actividade é gratuíta pero necesita inscrición previa na Biblioteca Municipal de Redondela (986 40 15 61) pois as prazas son limitadas.

 A Ruta das Bibliotecas encádrase dentro das actividades conmemorativas do 50 aniversario das Bibliotecas Municipais de Redondela

Leolo Go!, ruando por Redondela cos Amigos das Bibliotecas

Fóra Pokemon! En 2017 imponse Leolo Go! 😉

Esta mañá, na Alameda de Redondela tivo lugar a primeira actividade dos Amigos das Bibliotecas deste recén estreado 2017.

Tratábase dun xogo de búsqueda a través do teléfono móbil por toda Redondela, seguindo o modelo do famoso Pokemon Go e coa meta final de gañar un libro. O nome do xogo remite á popular aplicación xaponesa, pero adoptando o nome de Leolo, a mascota das nosas bibliotecas municipais.

A actividade resultou formidable. Tanto a rapazada, como os seus pais e nais, como os membros desta asociación e o persoal da biblioteca que participou na mesma, todos tivemos unha impresión moi positiva. Os Amigos recibiron eloxios por parte dos participantes, e o agradecemento de seguir mantendo o roteiro virtual para repetilo en máis ocasións.

AQUÍ PODEDES VER AS FOTOS 

Todo un logro para esta xove e pequena asociación, pero que tanto está a traballar a favor da lectura e das nosas bibliotecas.

A parte máis interesante do xogo era a mistura entre o seu compoñente lúdico e didáctico, xa que cada unha das Leoloparadas contiña información relevante, curiosa e de interese sobre a nosa vila.

Os participantes, 16 rapaces de diferentes idades, entre 6 e 16 anos, completaron o percorrido seguindo as pistas, e acadaron cadanseu agasallo. Os pais e nais acompañantes colaboraron e axudaron en todo o momento, e ata o tempo, que hoxe estaba un pouco difícil na nosa vila, fixo unha tregua para facilitar a actividade... (a chuvia non descargou ata que todos rematamos).

En definitiva, hoxe aprendimos moito e o pasamos estupendamente. Agardamos expectantes unha nova proposta cultural dos Amigos das Bibliotecas. 

Aínda que as Leoloparadas xa non están activas no terreo, o roteiro virtual permanece. Deste xeito podedes percorrer o centro de Redondela e detervos en cada unha destas singulares estacións para, a través da aplicación móbil, consultar a información da nosa vila coa que xogamos nesta actividade. De seguro vaivos gustar!

Agradecémoslles aos Amigos das Bibliotecas esta orixinal proposta e... Parabéns polo éxito!

Velaquí un resumo videográfico desta mañá de camiñada cultural, realizado por Roberto.

A Feira do Libro chega a Redondela!

Por vez primeira,  a Feira do Libro desembarca en Redondela. 

Accedede, na web da Federación de Librarías de Galicia, ás datas e horarios.
Proximamente, máis información

Benvidos ao Entroido en Redondela!

Programación de Nadal en Redondela

Presentación de "As aventuras dos golfiños" este venres en Chapela

Este venres, 12 de Xuño, ás 20:00 h. no Multiúsos Piñeiral do Crego de Chapela, terá lugar a presentación do libro "As aventuras dos golfiños".

Este libro é un proxecto que levaron a cabo dúas autoras de Redondela, vinculadas ambas ao mundo da educación infantil: Purificación Serrano Caviedes e mais Paula Gozalo. As ilustracións son obra de Purificación García.

Na mesma presentación se dará a coñecer o "Obradoiro para emocionarte", con orientacións pedagóxicas para mestres e pais, e unha cantiga, que forma parte da publicación.

Na publicación colabora o Departamento de Cultura do Concello de Redondela, a través do seu Servizo de Normalización Lingüística.

Estades todos convidados a coñecer esta obra e a gozar das aventuras mariñas dos golfiños e do noso patrimonio marítimo.

Os golfiños agardan por todos nós este venres en Chapela!

Leolo nas festas do Corpus

 

 Que alegría! A mellor das sorpresas neste día !
Dúas grandes amigas das bibliotecas enviáronnos estas fotografías do noso Leolo! Moitas grazas a elas e moitas grazas aos que tiveron esta bonita iniciativa facendo presente ao mellor representante das nosas bibliotecas nestas grandes festas.

Arquivo Audiovisual do Concello de Redondela

Remitimos unha nova de moito interese. 

 O Arquivo municipal de Redondela acaba de poñer en marcha un novo proxecto: o Arquivo Audiovisual do Concello de Redondela. Este pretende recoller fotografías e vídeos da nosa vila que podan ser de interese como documentos a conservar. O plantexamento é recoller as fotografías, vídeos ou documentos que están nas casas para poder escanealos, clasificalos e volcalos na páxina web, sempre facendo constar a propiedade de cada fotografía ou vídeo, e devolvendo os orixinais ó final da dixitalización. 

No caso de que contedes con material que vos gustaría aportar ou que esteades interesados, só tedes que poñervos en contacto co Arquivo municipal: no teléfono 986400300, na dirección de Correo arquivoaudiovisual@redondela.es, ou nas Oficinas municipais. 

No facebook:  https://www.facebook.com/ArquivoaudiovisualConcelloRedondela

Dámosvos as grazas a todos, de antemán, de parte dos responsables do Arquivo.

Uns libros moi solidarios...

Carta de agradecemento de Cáritas ás bibliotecas participantes.

O pasado 24 de Outubro, data na que se festexa o Día das Bibliotecas, as bibliotecas municipais, escolares e mais do Círculo Cultural Recreativo de Chapela puxemos en marcha unha campaña de intercambio de libros por alimentos. Co lema Libros solidarios, esta proposta animou aos nosos usuarios a achegar alimentos e produtos de hixiene aos nosos centros, levando a cambio libros que as bibliotecas dispuxemos para a ocasión.

Campaña na Biblioteca municipal de Redondela

Espazo disposto dende a Axencia de lectura municipal de Chapela no Multiusos. A actriz e contadora Raquel Queizás participou xenerosamente na mesma

No IES Chapela, coas alumnas colaboradoras na actividade

No CEIP Santo Paio de Abaixo

 No Ceip Quintela e mais no Ceip Laredo de Chapela

No Ceip Alexandre Bóveda de Chapela

No Círculo Cultural Recreativo de Chapela

Os medios de comunicación fixeron eco da nova, como Faro de Vigo, Atlántico Diario, Radio Redondela, Cousas de Redondela. 

Atlántico Diario

 E tamén outros xestores de novas e eventos na rede: Qué hacer en Vigo ou Vigo Low Cost contribuiron a darlle difusión a esta proposta.

Deste xeito, os nosos puntos de intercambio recibiron moitas visitas de interesados e curiosos, e o certo é que moitos dos usuarios nos felicitaron pola proposta.

Os alimentos e produtos solidarios foron entregados a Cáritas Redondela, que se encargou da súa recollida en cada un dos centros participantes durante o período da campaña, e que será agora quen se ocupe da súa distribución e reparto.

Unha vez rematada a campaña, o día 28 de Novembro, e feita a valoración da mesma por parte da organización receptora, temos que os bens recollidos superaron que unha tonelada de axuda: 830 kilos de alimentos e mais 280 kilos de produtos de hixiene.

Cáritas Redondela se mostrou moi agradecida coas bibliotecas pola iniciativa e pola "boa idea" de facer algo así.

Cartaz promocional da actividade e fotografía de presentación da campaña

Pola súa banda, as bibliotecas participantes queren expresar o seu agradecemento aos redondeláns pola xenerosidade das súas achegas; así como aos colaboradores: El Patito Editorial, Fundación Filomena Rivero Alonso e Biblioteca do CEIP San Salvador de Teis, pezas fundamentais para o éxito desta campaña. Por último, non se queren esquecer dos voluntarios de Cáritas Redondela, agradecendo a súa disposición nesta campaña, así como a labor que levan a cabo día a día e ano tras ano en favor dos máis desfavorecidos.

Lembramos que a campaña continúa aberta ata o 15 de decembro no Círculo Cultural Recreativo de Chapela e ata o día 19 de decembro na Axencia Municipal de Lectura de Chapela.

Grazas a todos! 

A nova no Faro de Vigo.

Prórroga da campaña "Libros solidarios" na Biblioteca de Chapela

Debido ao éxito da campaña "Libros solidarios" que, como sabedes, realizamos conxuntamente as bibliotecas municipais de Redondela xunto con outras bibliotecas da contorna, e tamén debido a que aínda contamos con libros para donar, na Biblioteca de Chapela prorrogamos a actividade ata o Venres 19 de Decembro.

As bibliotecas e mais os receptores das vosas doazóns, Cáritas Redondela, estamos moi agradecidos pola vosa resposta e pola vosa cariñosa participación.

Grazas de novo!

"Cruzando o Viaduto" Ímonos de viaxe en tren!

"Cruzando o Viaduto: conmemoración do 130 aniversario do segundo viaduto de Redondela e do ferrocarril Pontevedra-Redondela"

Repetimos a viaxe inaugural de 1884 da Estación de Redondela a Pontevedra!

Para nenos de 7 a 10 anos

O sábado 13 de Decembro, de 15:30 a 19:00 h.

De balde. Prazas limitadas. 

Inscrición previa na Biblioteca Municipal (tfno. 986 40 15 61)

Coa dirección de Francisco J. Gil, xornalista, escritor e vicepresidente da Asociación Viguesa de Amigos del Ferrocarril y Tranvías (AVAFT)

Obxectivos da actividade:

-Mostrar un dos episodios máis relevantes da historia contemporánea de Redondela como principal enclave ferroviario da provincia de Pontevedra.

-Difundir á xeración máis nova a historia dos viadutos de Redondela, unha peza esencial do perfil e a paisaxe da vila e durante moitos anos as obras de enxeñaría máis vistosas de toda a provincia.

-Realizar unha viaxe en tren que para algúns dos participantes será o seu bautismo ferroviario.

e..... pasalo xenial !!!

Cronograma da actividade:

Hora de chegada dos nenos á Estación de Ferrocarril de Redondela: 15.30 a 15.45.

Hora de saída do tren: 15.58

Chegada a Pontevedra: 16.17

Saída de Pontevedra: 17.32

Chegada a Redondela: 17.56

Visita á sede da Asociación de Amigos do Ferrocarril:

18.00 a 18.50

Hora e lugar de recollida dos nenos:

Vestíbulo da estación de Redondela, a partir das 18.55 ata 19.10 horas.

Moitas grazas a Luis Borines e a Francisco Gil pola súa entregada colaboración!

Organizan: Fundación Filomena Rivero Alonso e Bibliotecas Municipais de Redondela

Campaña solidaria de intercambio de libros por alimentos, nas bibliotecas de Redondela

 As bibliotecas de Redondela impulsan unha campaña de recollida de alimentos e produtos de primeira necesidade que se destinarán a Cáritas Redondela

 Libros solidarios é o lema desta campaña de intercambio de libros por alimentos, na que participan as bibliotecas municipais, a biblioteca do Círculo Cultural Recreativo de Chapela e as bibliotecas dos CEIP de Quintela, Santo Paio de Abaixo, Alexandre Bóveda, Laredo, do CEP Santa Mariña e dos IES Chapela e Mendiño. Todos estos centros son os puntos de intercambio.

 

A campaña dará comezo o venres, 24 de outubro, por ser este o Día da Biblioteca, e rematará o 28 de novembro ou ata que se esgoten as existencias. A iniciativa está aberta a calquera cidadán que quera colaborar e, nos centros de ensino particularmente ás súas comunidades escolares, cambiando alimentos non perecedoiros e produtos de hixiene, tanto persoal como para o fogar, polos libros que encontrarán expostos nos distintos centros de intercambio. Os visitantes collerán o libro ou libros do seu interese e deixarán a cambio os produtos nos recipientes colocados para tal efecto.

 Son colaboradores nesta iniciativa: Biblioteca do CEIP San Salvador de Teis, Fundación Filomena Rivero Alonso e El Patito Editorial. O noso máis agradecido recoñecemento a todos eles e dunha forma especial a Marta (que quere pasar desapercibida) polo marabilloso cartel que realizou con todo o cariño e detalle. Moitas grazas a todos!

(Na fotografía, a presentación da campaña coa presencia das bibliotecarias dos centros participantes e dalgún dos colaboradores)

A campaña foi recollida nestes días no Faro de Vigo.

Campaña de intercambio de libros por alimentos próximamente nas bibliotecas de Redondela

O vindeiro Venres 24 de Outubro, Día da Biblioteca, arrancará nas bibliotecas de Redondela unha campaña coa que as bibliotecas buscaremos recoller alimentos e produtos de primeira necesidade (produtos de hixiene, produtos de coidado infantil) a cambio de libros. 

A campaña parte das Bibliotecas municipais de Redondela e mais da biblioteca do Círculo Cultural Recreativo de Chapela, pero a ela xa se teñen adherido moitas bibliotecas dos centros de ensino do noso Concello.

Próximamente vos diremos cales.

Todos os bens recollidos na campaña serán entregados a Cáritas para a súa distribución entre as familias necesitadas da contorna.

Na vindeira semana, vos contaremos máis sobre esta actividade, facendo un chamamento para que todos vos acheguedes a estas bibliotecas para achegar doazóns aos nosos puntos de intercambio.

"Coca Parade" no Multiusos da Xunqueira

Magnífica e orixinal recreación da Coca de Redondela realizada polo alumnado do Ceip Santo Paio de Abaixo que podedes ver no Multiúsos da Xunqueira de Redondela.