Presentación do libro solidario "Elefantes de Papel" na Biblioteca de Chapela

O vindeiro venres 4 de maio teremos na Biblioteca de Chapela a presentación do libro solidario "Elefantes de Papel".

O libro é un compendio de 52 relatos curtos en galego e castelán, escritos conxuntamente por Berto Pirata e mais por María Salinas e ilustrados por Humberto Ademar Farias Igrexas.

A finalidade desta miscelánea de relatos é crear unha vaga de solidariedade. O libro vai ser presentado nun total de 50 localidades de toda Galicia (e noutros lugares da Península). Para iso, os autores doarán á asociación Conrazones da Guarda un euro das vendas de cada libro, e, a maiores, outro euro ao colectivo, ONG ou asociación da localidade onde presenten. Co recadado ao final da aventura anunciarán unha sorpresa solidaria na súa páxina de Facebook.

O proxecto inclúe tamén a visita a centros da terceira idade, de saúde mental, cárceres, etc., onde implican aos seus usuarios na teatralización dos relatos coa finalidade de que pasen un día diferente. Así mesmo organizaron charlas en colexios de primaria e institutos explicando a parte solidaria do proxecto.

O obxectivo de toda esta viaxe non é outra que tecer redes, axudar para entre todos cambiar o mundo. Sobre todo, traballando en cambiar os pequenos mundos que nos rodean.

Neste caso, os autores achegaranse á Biblioteca de Chapela da man da asociación redondelana Andaina, para a que se destinará parte dos beneficios do libro. Olga Lalín, escritora e membro da xunta directiva desta asociación, participará na presentación que se fará na Biblioteca de Chapela.

Agardámosvos o venres 4 de maio, ás 20:00 h.

Palabras para Rosalía

 Camelias a Rosalía nas bibliotecas de Redondela e de Chapela, no pasado mes de febreiro.

 No pasado mes de febreiro as bibliotecas municipais de Redondela participamos nos actos de homenaxe ao 180º aniversario de Rosalía de Castro realizados no noso concello.

A proposta do equipo de Normalización Lingüística, nas bibliotecas dispuxemos camelias para que rapaces e adultos llelas adicaran á nosa escritora e para que, en cada unha delas, indicaran a súa palabra favorita en lingua galega.

Pois ben, o departamento de Normalización Lingüística ven de analisar as palabras escollidas por parte dos nosos/as usuarios/as.

82 foron o total dos participantes na actividade, xuntando as camelias ofrecidas nas bibliotecas de Redondela e mais de Chapela.

 Vanessa, na Biblioteca de Chapela e a contadora Marisa Irimia colocan as súas camelias na honra de Rosalía.

A palabra que máis apareceu entre as camelias adicadas, a palabra favorita dos nosos usuarios/as foi: “bolboreta”. 

E seguido dela, foron outras palabras: “animais”, “choiva”, “morriña”, “amor”, “beizo”, “ledicia”, “quérote”, “axóuxere”, “parrulo”, “auga” e “bico/biquiño”.

Non son todas fermosas?

O máis interesante é que vos acheguedes á análise que fixeron sobre estas palabras no departamento de Normalización. Védeo NESTA ENLACE.

Xesús Constela achéganos "A rotura das paisaxes" na Biblioteca de Chapela

Xesús Constela, acompañado polo seu irmán Xurxo e mais por Fran Alonso, falando da súa literatura

Este venres a Biblioteca de Chapela recibiu unha visita excepcional.

A proposta dos Amigos das Bibliotecas Municipais, o escritor Xesús Constela achegouse aos lectores da nosa biblioteca para falarnos da súa última novela: "A rotura das paisaxes", publicada por Xerais.

Ver aquí as fotos

Xesús recita un poema que forma parte da obra

En compañía do seu irmán, o coñecido arqueólogo de Redondela Xurxo Constela, e mais do editor Fran Alonso, Xesús compartiu cos nosos lectores as súas ideas como escritor, algúns aspectos relacionados coa súa obra creativa e, tamén, moitas anécdotas.

Fran Alonso comentando algúns aspectos da edición

Ademáis pudemos gozar do teaser do libro: unha pequena peza videográfica que convida a ler esta obra. Esta xoia audiovisual está asinada nada menos que polo director de cinema Mario Iglesias, que neste venres tamén estivo connosco na biblioteca.

Podedes ver AQUÍ o teaser do libro:

A presentación foi fascinante. Xurxo achegounos a parte máis persoal e emotiva, mentres que Fran Alonso nos deu a súa visión como editor. Xesús gozou de contarnos moitos aspectos relacionados co proceso da escrita, as súa influencias literarias e os seus obxectivos. Escribir, como el nos comenta, é arriscar, e a literatura non avanza por novelas "acomodaticias", senón por aquelas que se saen do establecido e innovan, como sen dúbida é o caso desta obra.

Os asistentes ao acto, na Biblioteca de Chapela

A agradable charla deste venres moveu a nosa curiosidade por achegarnos á novela, que xa está dispoñible nas nosas bibliotecas. 
Finalmente, o audiovisual de Mario Iglesias cativou aos asistentes pola súa forza evocadora, resultando todo un agasallo aos nosos sentidos.

Xesús posa con Leolo e mais Gato, as mascotas da biblioteca, e xunto cos Amigos das Bibliotecas de Redondela e o persoal do centro

Xesús Constela acompañado por Fran Alonso, Mario Iglesias e mais por Roberto

Agradecemos aos asistentes terse achegado ao noso centro de Chapela para gozar connosco deste momento, e expresamos aquí o noso recoñecemento a Xesús e Xurxo Constela, a Fran Alonso e mais a Mario Iglesias por lle dar vida á literatura na nosa biblioteca.

Leolo e Gato posan moi contentos con dous libros dedicados para a biblioteca, por Xesús Constela e mais por Fran Alonso

Grazas tamén aos Amigos das Bibliotecas de Redondela por propoñer e organizar a actividade e, por suposto a Roberto Solano, por ofrecernos as fotografías da actividade, e tamén pola súa inestimable axuda para sortear os atrancos técnicos nesta actividade.

Xesús falou así desta actividade no seu Facebook. Agradecémoslle un xesto tan fermoso con nós.

Xesús Constela presenta o seu último libro na Biblioteca de Chapela

Este mes de setembro traemos moitas novidades literarias nas bibliotecas municipais de Redondela, grazas aos Amigos das bibliotecas. 

Despois do encontro con Pere Tobaruela en Redondela, a Asociación de Amigos nos achega outra grande figura do noso panorama literario. Desta vez será a Biblioteca de Chapela a que acollerá a presentación da última novela de Xesús Constela: "A rotura das paisaxes".

Xesús Constela (Ferrol, 1963) vive en Poio e deuse a coñecer ao gañar o Premio Torrente Ballester con As humanas proporcións (2004), colección de relatos galardoada tamén co premio da Asociación Española de Críticos Literarios. Dende entón, ten unha extensa obra literaria publicada en editoriais como Galaxia, Embora ou Xerais.

Fotografía do autor na páxina da editorial Xerais

A miña escrita sempre obedece a un mesmo esquema: a realidade achega unha idea que eu teimo en traballar coma un pasteleiro que traballa a masa dun (futuro) biscoito. Plasmo esa idea primixenia xa traballada nun papel (a través da computadora, nunca a man) e déixoa repousar (ás veces anos) para retomala ao cabo dun tempo e empezar a transformala pouco a pouco. Ás veces xunto tres, ou catro, ou cinco ideas e con elas constrúo algo diferente do que inicialmente artellara. (Xesús Constela)

Poderedes achegarvos este venres 16 de setembro, ás 20:30 h. á Biblioteca de Chapela para coñecer a este escritor e a súa última novela. 

Dous homes de avanzada idade camiñan por unha praia enleados en distintas conversas mentres, para o seu abraio e incomodidade, atenden, sen pretendelo, a unha serie de acontecementos que escapan da súa comprensión e van alterando o seu estado de ánimo. Esa circunstancia obrígaos a reflexionar sobre a súa situación na praia, sen liberarse da dúbida de que se atope alguén máis canda eles a quen non dan visto. Cunha linguaxe multifocal, que ás veces roza o surrealismo, Xesús Constela achéganos un libro no que xoga con diversas técnicas literarias que van desde o máis espido dos diálogos, ata unha sorte de poesía de carácter narrativo, pasando pola linguaxe cinematográfica ou a prosa poética, entre outras.

Participarán no coloquio o arqueólogo Xurxo Constela e mais Fran Alonso, en representación da editorial Xerais.

Ademáis, contaremos cun espazo de venda, para que os interesados podan adquirir o libro e levalo asinado para a casa.

Entrada libre e de balde.

AVISO IMPORTANTE: O servizo de préstamo da biblioteca pechará media hora antes do comezo da actividade.

"A teoría dos contrarios", un exercicio de liberdade

  "Entender o teu propio entorno para entender o mundo"

"Unha novela que se explica por como está contada non polo que conta" 

"Todo xira ao redor de entender ao outro, ao "alter"

               Xosé González Martínez presenta o acto, na Casa da Cultura de Redondela.
                          Pere Tobaruela fala do seu libro "A teoría dos contrarios"
                                            ( Filmación de Roberto Solano )

Agustín Fernández Paz... descanse para sempre (1947-2016)

Agustín Fernández Paz [AELG]

Esta mañá, por volta das 07.00 h., finou en Vigo o escritor Agustín Fernández Paz, logo dunha longa enfermidade.

O escritor vilalbés, é probablemente o autor máis querido da nosa literatura, o máis traducido a outras linguas e un dos máis vendidos. 

Autor dunha extensa obra, 67 libros, maiormente no ámbito da literatura infantil e xuvenil, Fernández Paz tamén ten publicado ensaio e libros divulgativos, especialmente relativos ao mundo da lingua e da normalización, no que estaba moi implicado. Ademáis, os seus libros obtiveron numerosos premios, tanto a nivel galego como nacional ou internacional.

Nas bibliotecas municipais de Redondela, que tivemos a oportunidade de coñecelo e de gozar, máis aló do seu discurso, da súa calidade humana, non o esquecemos.

Elena Becerra xunto con Agustín Fernández Paz
no Congreso Internacional do IBBY celebrado en Santiago en 2010 

A literatura infantil e xuvenil e as letras galegas fican así de loito por esta perda. Vaise todo un referente da nosa lingua e das nosas letras, pero que sempre estará presente, a través da súa obra, para as xeracións vindeiras.

Ampliar a nova en Sermos Galiza.

Día de Rosalía... As lecturas en Radio Redondela

Este martes, 24 de Febreiro, festexouse en toda Galicia o Día de Rosalía, cun sinfín de actividades de recordo e moitas manifestacións de achegamento e de agarimo á nosa grande escritora.

Doodle de Rosalía de Castro en Google, 0 24 de Febreiro

Radio Redondela e mais o Servizo de Normalización Lingüística do Concello de Redondela festexaron esta actividade convidando a todos os que o quixeren, a gravar na radio a lectura dalgún texto da escritora. Durante toda a semana estas lecturas se emitiron na nosa radio municipal.

Cartel de Rosalía de Castro difundido pola editora El Patito Editorial

O persoal das Bibliotecas Municipais de Redondela, xunto con outros veciños e veciñas, amantes e amigos da poesía, e mais da escritora, participamos con moito agrado nesta acción. 

Se queredes escoitar estas lecturas, podedes premer na seguinte imaxe:

PICA NA IMAXE PARA ESCOITAR AS LECTURAS DE ROSALÍA EN RADIO REDONDELA

"Eu son Rosalía"

Celebra o DÍA DE ROSALÍA coa Radio Municipal de Redondela e o SNL.

 

 

 Para conmemorar o aniversario do nacemento de Rosalía de Castro (24 de febreiro de 1837),  os dous servizos súmanse á proposta da AELG (Asociación de Escritoras/es en Lingua Galega) coa iniciativa “Eu son Rosalía“.

 A vosa achega consistirá na gravación en Radio Redondela, entre os días 10 e 20 de febreiro, de lecturas da obra rosaliana ou de opinións e impresións sobre a súa obra, nas que cada persoa descubrirá con cal das múltiples “rosalías” e con que sensibilidades da autora se sente máis identificada. Neste caso, deberán comezar coa frase “Eu son Rosalía porque/cando/para…”, seguindo a iniciativa da AELG.

O horario para achegarse á emisora de Radio Redondela (situada no 2º andar da Casa da Cultura) para facer as gravacións é de 13 a 14.30 h, e de 17.30 a 19.00 h, de luns a venres.

As gravacións emitiranse durante a programación habitual de Radio Redondela na semana do 23 ao 27 de febreiro.

(Fonte, SNL Redondela)

Blanco Amor e A Esmorga nos clubs de lectura de Redondela

Aproveitando que o escritor Eduardo Blanco Amor, clásico do noso corpus literario, está de actualidade en Redondela, nos clubs de lectura das nosas bibliotecas escollemos a lectura de A Esmorga para este mes. A Esmorga é a obra máis sonada do escritor, e un referente das nosas letras. Ademáis, nestes días se ven de estrear a súa máis reciente e máis literaria versión cinematográfica.

Para introducir a sesión, comezamos asistindo á proxección do documental "Universo Blanco Amor", producido pola Asociación de Escritoras e Escritores en Lingua Galega (AELG), proxección que estivo aberta ao público no auditorio do Multiusos de Chapela.

Despois de ver o documental, nos xuntamos na biblioteca para falar do escritor e da súa obra. Para moitos, a lectura veu ser un reencontro moitos anos despóis da súa primeira lectura, aló nos tempos de BUP ou Bacharelato, mais para algúns, foi novidade. Ainda que as opinións foron diversas,todos os que nos achegamos á novela na segunda lectura, coincidimos en que a atopamos máis interesante e que nos gustou máis que na primeira vez.

Fran P. Lorenzo, gañador do Premio Blanco Amor, outorgado onte en Redondela

O gañador: Fran P. Lorenzo -Fotografía tomada de El Diario.es-

Na mañá de onte concedeuse en Redondela o Premio Blanco Amor de Novela Longa deste ano.

Ás 12:30 da mañá o xurado daba o seu veredito unánime, escollendo a obra co título "Cabalos e lobos", cuxo autor é o periodista vigués Fran P. Lorenzo.

O premio comezou a súa andaina no ano 1981, por iniciativa do Concello de Redondela, como homenaxe a unha figura senlleira da literatura de Galicia, Eduardo Blanco Amor.

 

Nesta XXXIII edición, o Concello de Redondela asumiu de novo a súa organización, en vista de que a continuidade do galardón estaba en perigo, e das 40 candidaturas que se presentaron, obtivo o premio esta novela ambientada no Vigo da II Guerra Mundial.

Noraboa ao gañador!

O Concello de Redondela está a ofrecer unha programación especial relacionada co Premio Blanco Amor, coa representación de obras teatrais en centros de ensino secundario. Á súa vez, as bibliotecas municipais proxectaremos o documental "Universo Blanco Amor", producido pola AELG, o vindeiro Luns 17, ás 20:00 h. no Auditorio do Multiusos de Chapela, e os nosos clubs de lectura analisarán a novela "A Esmorga" na súa xuntanza deste mes.

I Quedada Literaria : todas as fotos

                                               

Accede aquí ao álbum fotográfico da Quedada 2014 do pasado 15 de maio no Parque de Castrelos de Vigo, coa participación por parte de Redondela do CEP Santa Mariña e das Bibliotecas Municipais de Redondela.

 

E,  no minuto 11 do Telexornal Galicia do devandito día 15 (Programa do 15 de Maio de 2014, ás 14:00 h.), podedes ver a nova (ATENCIÓN! que nela fala nada máis e nada menos que a directora das nosas bibliotecas municipais)

....Elena, xa ves que desta non te libras ;-)

Velaquí a nova completa, no Telexornal de RTVE

#euRosalía

Aínda que non é unha autofoto, propiamente dita, non queremos deixar de unirnos á iniciativa da Fundación Rosalía de Castro  #euRosalía.

Na fotografía: Eva, de Normalización Lingüística, Mª Elena e Cote, da Biblioteca Municipal e Mª José da Axencia de Lectura de Chapela (presente en intención).

Bo día rosaliano para todos!!!

Leolo tamén quiso participar, pousando coa imaxe de Rosalía que deseñou Rei Zentolo.

Os Megatoxos, Venecia e o Club Xuvenil de Lectura

Os Megatoxos, personaxes creados polo escritor e ilustrador Anxo Fariña, son catro mozos que teñen que compatibilizar as clases no instituto, cunha dobre vida que os impulsa a viaxar na procura dunha cura para a súa mutación xenética, un cambio provocado por unha planta moi especial, o Toxo. Esta planta mutante ten, entre outras, a capacidade de viaxar no espazo e no tempo.

E cos Megatoxos, e coa aventura "A cara oculta de Lúa", cuarta entrega da saga, somerxémonos nun mundo de aventuras, con viaxes no espazo e no tempo, poderes máxicos moi particulares e a afouteza deste grupo de amigos na súa loita frente ao poder do Mal.

 

Descubrimos ao seu autor, Anxo Fariña, facendo un percorrido polos libros da biblioteca. Ademáis, dado que a novela nos achegaba á cidade de Venecia, trasladámonos coa maxia da imaxinación á cidade das 118 illas, e fomos coñecendo algúns dos rasgos da súa cultura: as góndolas, os canais, a Praza de San Marcos, o seu Entroido ou o famoso personaxe Casanova.

 

 Cos seus particulares saberes máxicos, Leo lle deu vida aos obxectos, do mesmo xeito que podían facer os personaxes da novela.

 

 

Ademáis, ao rematar a xuntanza, recibimos unha grande sorpresa nun mensaxe secreto que só podemos descubrir grazas ao fogo e, de novo, á maxia de Leo.

 

Novos participantes os que se anotaron ao club nestes últimos días.

A eles, e aos que xa levades tempo connosco, graciñas por vir! Agardamos contar convosco nas vindeiras reunións.

Feliz Día das Letras Galegas, Roberto Vidal Bolaño

Feliz Día das Letras Galegas!
Como xa sabedes, este ano se lle adica tan importante conmemoración ao dramaturgo Roberto Vidal Bolaño.

Velaquí tedes a súa web (premede na imaxe), realizada pola Asociación Cultural Roberto Vidal Bolaño:

• Hoxe, ás 17:45 h., na Alameda de Redondela, terá lugar o acto institucional en homenaxe a esta data.
• Pola súa banda, os  libreiros de Redondela, expoñen os seus libros en galego nos soportais da Casa do Concello.

• Este luns 20, a patir das 11:00 h. Radio Redondela emitirá un fragmento da  obra de Vidal Bolaño: Cochos, realizado polo alumnado da ESAD de Vigo.

• E tamén o luns 20, ás 20:30 h., na Casa da Cultura, o tamén dramaturgo e profesor Roberto Pascual, presentará o seu libro: Roberto Vidal Bolaño e os oficios do teatro, editado por Xerais.
  

Nun día moi teatral para toda Redondela, ao estar invadida polos títeres do noso famoso Festival Internacional de Títeres, louvámonos de que este ano a celebración das Letras Galegas se achegue máis ca nunca ao teatro.



Vídeo da actividade "Tecín soia a miña tea", no homenaxe a Rosalía de Castro realizado polas Bibliotecas de Redondela

Durante a pasada Semana do Libro as Bibliotecas Municipais de Redondela fixemos unha homenaxe especial a Rosalía de Castro, autora fundamental na historia das nosas letras, e cunha obra moi destacada que serviu para recuperar a creación literaria en galego.

Cantares Gallegos cumpre hoxe 150 anos máis vivo que nunca, como demostran os numerosos actos conmemorativos en toda Galicia e tamén en outras partes do mundo.

A nosa adicatoria a Rosalía levouna a cabo Ana Hermida, maravillosa actriz, divertida e moi dinámica, que se transformou na poetisa durante unha espléndida interpretación do recital Tecín soia a miña tea, na Biblioteca de Chapela.

Hoxe, Día das Letras Galegas, temos o pracer de amosarvos o vídeo que resume esta actuación, para que o gocedes e que sintades a esta Rosalía con tanto agarimo coma nós.

Feliz 150 aniversario!

Centro de interese sobre Rosalía de Castro na Biblioteca de Chapela

Nestes días tedes á vosa disposición o noso interesante centro de interese sobre Rosalía de Castro, protagonista do noso recital poético deste xoves: "Tecín soia a miña tea", con Ana Hermida.

Aquí as nosas amigas Alba e mais Rocío nos fan a presentación:

E para aqueles que gozáchedes onte co noso recital sobre Rosalía de Castro (ou os que non), e querades afondar un pouco máis nos seus textos en prosa, tan descoñecidos pero, como vimos, tan interesantes, feministas e atrevidos:

• Podedes pedir este libro na biblioteca, que recolle as súas obras en prosa (PREMEDE NA IMAXE):

• Ou ben, consultalos na web oficial da escritora, onde se poden ler a texto completo.

Arrebatadora Rosalía de Castro na Biblioteca de Chapela

Este xoves gozamos na Biblioteca de Chapela dun momento máxico, intenso e arrebatador, con Ana Hermida, unha excelente condutora das nosas sensacións, e unha incomparable recitadora de Rosalía de Castro.

VER AQUÍ O ÁLBUM DE IMAXES

VER AQUÍ VÍDEO DA ACTIVIDADE

A través de versos, pero tamén daqueles textos en prosa, menos coñecidos dentro da obra rosaliana, a nosa intérprete nos achegou unha faceta bastante diferente da poeta de Padrón. O humor, a retranca, a carraxe, a reivindicación ante as inxustizas, e un marcado feminismo no seu pensamento.

Unha Rosalía forte e paixoal, e unha Rosalía tamén irónica cos costumes do seu tempo, facetas que moitos apenas coñeciamos.

Ana Hermida, caracterizada como Rosalía de Castro, interpretou á poeta, falándonos do seu sentir hacia o teatro, da súa atracción polos versos, e das dificultades de querer escribir no seu tempo sendo muller.

Con "A estrela perdida do teatro", de Miguel Anxo Fernán-Vello, comezou o recitado, aludindo á vocación teatreira de Rosalía.

Continuou con poemas das diferentes obras de Rosalía: 
 "San Antonio Bendito" ou o fermoso poema cantado "Hora meu meniño hora", de Cantares Gallegos. 
E tamén: "Vaguedás", "Decides que o matrimonio", "Tanto e tanto nos odiamos", "Xan", "Calade!", "Brancas virxes de cándidos rostros", "Ti onte, mañán eu", "Ladraban contra min que camiñaba", "A xustiza pola man", de Follas Novas.

Dende o máis humorístico e irónico ata o máis tenro, e lírico, pasando polo reivindicativo feminista e de defensa da súa terra. Ana Hermida nos fixo vibrar co seu recitado e coa musicación vocal dos poemas.

 Rematou co ton máis intenso e dramático, neste caso, co poema que daba nome a este recital: Tecín soia a miña tea, onde nos fala da soidade da muller, que nada pode esperar do home que non chega.

Pola súa forza e intensidade, deixámosvolo aquí para que o gocedes:

Tecín soia a miña tea,
sembrei soia o meu nabal,
soia vou por leña ó monte,
soia a vexo arder no lar.
Nin na fonte nin no prado,
así morra coa carrax,
el non ha de virm'a erguer,
el xa non me pousará.
¡Que tristeza! O vento soa,
canta o grilo ó seu compás...
Ferve o pote... mais, meu caldo,
soíña t'hei de cear.
Cala, rula, os teus arrulos
ganas de morrer me dan;
cala, grilo, que si cantas,
sinto negras soïdás.
O meu homiño perdeuse,
ninguén sabe en onde vai...
Anduriña que pasache
con el as ondas do mar;
anduriña, voa, voa,
ven e dime ond'está. 
Rosalía de Castro (1993). Follas Novas. (Vigo: Galaxia)

A actividade realizouse dentro da programación da V Semana do Libro, elaborada conxuntamente polas bibliotecas municipais e o Servizo de Normalización do Concello de Redondela; e grazas, tamén, á participación do programa Ler Conta Moito, promovido pola Consellería de Cultura da Xunta de Galicia.

Aquí podedes ver o noso centro de interese bibliográfico, con libros de Rosalía de Castro da nosa biblioteca.

Falar e escribir en galego con Carlos Callón

Comezamos coa programación da V SEMANA DO LIBRO: A FESTA DAS PALABRAS. Achégate a esta cita con Carlos Callón para aprender a "falar e escribir en galego con fluidez e corrección".

 mércores, 17 de abril, ás 20:30 h. 

na Casa da Cultura de Redondela