Ciencia e fantasía para cativar á rapazada da Biblioteca Xela Arias

Este xoves o grupo Ceo Aberto despregou a súa maxia científica máis abraiante para enfeitizar aos rapaces e rapazas da Biblioteca Xela Arias de Chapela.

O obradoiro "A ciencia de Harry Potter" anunciado dentro da programación infantil das nosas bibliotecas municipais, colgou o cartel de completo nesta proposta tan atraente e innovadora. Un total de 40 rapaces e rapazas, fans de Harry Potter e/ou apaixoados da ciencia gozaron dunha exhibición abraiante de experimentos científicos moi divertidos.

Un xeito inmellorable de xuntar divulgación, ciencia, experimentos coa electricidade, literatura, maxia e fantasía nunha única tarde dentro do espazo dunha biblioteca... e cuns participantes moi motivados aos que lles agradecemos o seu entusiasmo.

Grazas por participar!
 

 PODEDES VER AQUÍ MÁIS IMAXES DA ACTIVIDADE

A actividade tivo lugar dentro do programa Ler conta Moito da Consellería de Cultura.  

"A ciencia de Harry Potter": nova actividade infantil na Biblioiteca de Chapela

A divulgación científica e o atraente universo literario de Harry Potter conflúen na vindeira actividade que preparamos para o mes de outubro na Biblioteca Xela Arias de Chapela.

O grupo Ceo Aberto sorprenderá e divertirá aos nenos e nenas de Chapela con unha proposta de ciencia lúdica e didáctica. Porque aprender ciencia pode ser moi divertido, sobre todo se a misturamos co melloriño da literatura xuvenil dos nosos tempos.

A cita será o vindeiro xoves 10 de outubro, ás 18:30h.

A proposta está deseñada para rapazada de 7 a 12 anos. Os interesados poderán inscribirse dende xa na biblioteca.

A Ciencia de Harry Potter é un espectáculo-charla cientifíca de inspiración Literaria. A través de experimentos espectaculares iremos percorrendo o mundo creado por J. L. Rowling e analizando desde a óptica da Ciencia a viabilidade no mundo real ou non do universo literario de Harry Potter.

Se vos interesa a ciencia, se vos gusta Harry Potter ou se queredes pasar un bo rato aprendendo cousas novas, inscribídevos xa!

Podedes anotarvos para o contacontos:
- Achegándovos á Biblioteca de Chapela
- Por teléfono, chamando ao 986-454-226
- No correo electrónico: bibliotecachapela@redondela.gal

A actividade é de balde, e ofrecémola grazas ao programa Ler conta moito, da Rede de Bibliotecas de Galicia.

Programa de actividades infantís das bibliotecas de Redondela.

 

A ciencia divertida de Nita, na Biblioteca de Chapela

Esta semana tivo lugar unha das celebracións máis queridas por a nosa biblioteca: o Día do Libro infantil e xuvenil. 

Na biblioteca de Chapela festexámolo desta vez, dun xeito diferente, cun achegamento á literatura e mais á ciencia para os máis cativos. 

 Ver álbum de fotos da actividade

Da man da contadora Nita (Ana Romero), os rapaces escoitaron contos e mais practicaron con experimentos.

A proposta dirixiámola a nenos máis pequenos do habitual, pois faciamos un grupo de 2 a 3 anos, e mais outro de 4 a 6. Con eles a biblioteca se encheu como nunca de cativos e cativas, pais e nais, moi expectantes estes últimos por experimentar coa ciencia e por ver a reacción das súas crianzas nunha actividade tan orixinal.

Para a biblioteca tamén era toda unha novidade contar con participantes tan pequenos, mais foi unha grata sorpresa ver a reacción destes, que se mantiñan atentos e moi interesados.

Os contos: El globito rojo, Lúa de Kalandraka, e mais, La estrella de Laura, adaptado pola propia contadora, serviron como introducción dunha serie de experimentos: 

Estrelas máxicas

• Globo vermello: facer bailar un globo polo chan, ou inchalo sen a intervención do noso aire, mover un misto coa electricidade estática dun globo, etc.

• Estrelas: facer estrelas máxicas con palillos e mais pintura amarela.

• Auga: voltear un vaso de auga tapado cunha carta, e que a auga non caia, meter un papel nun vaso con auga e que non se molle.

• Lámpada de lava: con tintas fluorescentes. 

  

  Lámpada de lava

Fixemos tamén as nosas propostas lectoras dende a biblioteca

A actividade foi moi ben valorada por todos os participantes, e levouse a cabo grazas ao programa Ler conta moito, da Xunta de Galicia.

"A ciencia é divertida" Obradoiro para cativos de 2 a 6 anos, na Biblioteca de Chapela

O venres 4 de Abril celebraremos na Biblioteca de Chapela o Día Internacional do Libro infantil con esta interesante actividade que mistura os contos coa ciencia. Ciencia divertida e apaixoante para introducirlles aos máis cativos o interese por a explicación científica ao que nos rodea.

Nos primeiros anos de vida movénos pola curiosidade. Por iso é esencial aproveitar todos os momentos para que os nenos e as nenas aprendan da forma máis divertida. A ciencia está presente na nosa vida e nos nenos e as nenas aínda o están descubrindo. Deixémoslles experimentar!

Este conto-obradoiro farase en dúas sesións:
- A primeira, de 18:00 a 18:30, para cativos de 2 a 3 anos.
- A segunda, de 18:45 a 19:30, para cativos de 3 a 6 anos.

A actividade é gratuita, pero precisa inscrición previa, porque as prazas son limitadas. 

Os requisitos para participar son: 
- Estar dentro do grupo de idade sinalado
- Ser socio das Bibliotecas Municipais de Redondela.

As opcións para inscribirse:
- Contactar coa biblioteca de Chapela, en horario de 16:30 a 21:00, de Luns a Venres.
- Por teléfono, dentro do horario indicado, no número da biblioteca de Chapela: 986-454-226.
- Por correo electrónico, no enderezo: bibliotecachapela@redondela.es

O obradoiro desenvolverao Nita (Ana Romero), grazas ao programa Ler conta moito, da Xunta de Galicia.