Suxestións lectoras das bibliotecas escolares e municipais de Redondela

Pica en cada imaxe para ampliar

As Bibliotecas Municipais de Redondela participan nunhas xornadas do IES Chapela sobre infancia e discapacidade

Nesta semana celebráronse no IES Chapela unhas xornadas sobre infancia e discapacidade:"Miradas diversas na infancia". Organizadas polo departamento de Servizos Socioculturais e á Comunidade do mesmo centro e destinadas ao alumnado dos ciclos de Educación infantil e mais o de Atención ás persoas en situación de dependencia, as xornadas contaban coa participación das Bibliotecas Municipais de Redondela.

As bibliotecas participamos co préstamo dun conxunto de libros sobre a temática referida. Un lote formado por máis de 50 títulos, e que contiña fundamentalmente contos infantiles, novelas, álbumes, e cómics cuxa temática fora a discapacidade e diferentes situacións de vulnerabilidade na infancia. Estes libros se dispuxeron para a consulta do alumnado participante das xornadas a través da coordinación da biblioteca do centro.

Asimesmo, e dentro das xornadas, asistimos á presentación do libro "Hada Esther", cos seus autores, Olga Lalín e Seso Durán. A eles, cos que xa participamos nas bibliotecas noutras ocasións, lles damos as grazas polo interesante, enriquecedor e profundamente humano de todo o que lle achegaron ao alumnado na súa charla.

Olga Lalín e Seso Durán durante a súa ponencia nestas xornadas.
Fotografía realizada por Seso Durán

Quedamos agradecidos ao IES Chapela por convidarnos a participar nunha actividade tan interesante, e estaremos encantados de que podan contar con nós para outras futuras.

Uns libros moi solidarios...

Carta de agradecemento de Cáritas ás bibliotecas participantes.

O pasado 24 de Outubro, data na que se festexa o Día das Bibliotecas, as bibliotecas municipais, escolares e mais do Círculo Cultural Recreativo de Chapela puxemos en marcha unha campaña de intercambio de libros por alimentos. Co lema Libros solidarios, esta proposta animou aos nosos usuarios a achegar alimentos e produtos de hixiene aos nosos centros, levando a cambio libros que as bibliotecas dispuxemos para a ocasión.

Campaña na Biblioteca municipal de Redondela

Espazo disposto dende a Axencia de lectura municipal de Chapela no Multiusos. A actriz e contadora Raquel Queizás participou xenerosamente na mesma

No IES Chapela, coas alumnas colaboradoras na actividade

No CEIP Santo Paio de Abaixo

 No Ceip Quintela e mais no Ceip Laredo de Chapela

No Ceip Alexandre Bóveda de Chapela

No Círculo Cultural Recreativo de Chapela

Os medios de comunicación fixeron eco da nova, como Faro de Vigo, Atlántico Diario, Radio Redondela, Cousas de Redondela. 

Atlántico Diario

 E tamén outros xestores de novas e eventos na rede: Qué hacer en Vigo ou Vigo Low Cost contribuiron a darlle difusión a esta proposta.

Deste xeito, os nosos puntos de intercambio recibiron moitas visitas de interesados e curiosos, e o certo é que moitos dos usuarios nos felicitaron pola proposta.

Os alimentos e produtos solidarios foron entregados a Cáritas Redondela, que se encargou da súa recollida en cada un dos centros participantes durante o período da campaña, e que será agora quen se ocupe da súa distribución e reparto.

Unha vez rematada a campaña, o día 28 de Novembro, e feita a valoración da mesma por parte da organización receptora, temos que os bens recollidos superaron que unha tonelada de axuda: 830 kilos de alimentos e mais 280 kilos de produtos de hixiene.

Cáritas Redondela se mostrou moi agradecida coas bibliotecas pola iniciativa e pola "boa idea" de facer algo así.

Cartaz promocional da actividade e fotografía de presentación da campaña

Pola súa banda, as bibliotecas participantes queren expresar o seu agradecemento aos redondeláns pola xenerosidade das súas achegas; así como aos colaboradores: El Patito Editorial, Fundación Filomena Rivero Alonso e Biblioteca do CEIP San Salvador de Teis, pezas fundamentais para o éxito desta campaña. Por último, non se queren esquecer dos voluntarios de Cáritas Redondela, agradecendo a súa disposición nesta campaña, así como a labor que levan a cabo día a día e ano tras ano en favor dos máis desfavorecidos.

Lembramos que a campaña continúa aberta ata o 15 de decembro no Círculo Cultural Recreativo de Chapela e ata o día 19 de decembro na Axencia Municipal de Lectura de Chapela.

Grazas a todos! 

A nova no Faro de Vigo.

Campaña solidaria de intercambio de libros por alimentos, nas bibliotecas de Redondela

 As bibliotecas de Redondela impulsan unha campaña de recollida de alimentos e produtos de primeira necesidade que se destinarán a Cáritas Redondela

 Libros solidarios é o lema desta campaña de intercambio de libros por alimentos, na que participan as bibliotecas municipais, a biblioteca do Círculo Cultural Recreativo de Chapela e as bibliotecas dos CEIP de Quintela, Santo Paio de Abaixo, Alexandre Bóveda, Laredo, do CEP Santa Mariña e dos IES Chapela e Mendiño. Todos estos centros son os puntos de intercambio.

 

A campaña dará comezo o venres, 24 de outubro, por ser este o Día da Biblioteca, e rematará o 28 de novembro ou ata que se esgoten as existencias. A iniciativa está aberta a calquera cidadán que quera colaborar e, nos centros de ensino particularmente ás súas comunidades escolares, cambiando alimentos non perecedoiros e produtos de hixiene, tanto persoal como para o fogar, polos libros que encontrarán expostos nos distintos centros de intercambio. Os visitantes collerán o libro ou libros do seu interese e deixarán a cambio os produtos nos recipientes colocados para tal efecto.

 Son colaboradores nesta iniciativa: Biblioteca do CEIP San Salvador de Teis, Fundación Filomena Rivero Alonso e El Patito Editorial. O noso máis agradecido recoñecemento a todos eles e dunha forma especial a Marta (que quere pasar desapercibida) polo marabilloso cartel que realizou con todo o cariño e detalle. Moitas grazas a todos!

(Na fotografía, a presentación da campaña coa presencia das bibliotecarias dos centros participantes e dalgún dos colaboradores)

A campaña foi recollida nestes días no Faro de Vigo.

Campaña de intercambio de libros por alimentos próximamente nas bibliotecas de Redondela

O vindeiro Venres 24 de Outubro, Día da Biblioteca, arrancará nas bibliotecas de Redondela unha campaña coa que as bibliotecas buscaremos recoller alimentos e produtos de primeira necesidade (produtos de hixiene, produtos de coidado infantil) a cambio de libros. 

A campaña parte das Bibliotecas municipais de Redondela e mais da biblioteca do Círculo Cultural Recreativo de Chapela, pero a ela xa se teñen adherido moitas bibliotecas dos centros de ensino do noso Concello.

Próximamente vos diremos cales.

Todos os bens recollidos na campaña serán entregados a Cáritas para a súa distribución entre as familias necesitadas da contorna.

Na vindeira semana, vos contaremos máis sobre esta actividade, facendo un chamamento para que todos vos acheguedes a estas bibliotecas para achegar doazóns aos nosos puntos de intercambio.

I Quedada Literaria de Vigo e Bisbarra

O CEP Santa Mariña e a Biblioteca Municipal tomarán parte na 

I Quedada Literaria de Vigo e Bisbarra

Nove centros educativos participarán nesta actividade organizada polo Cifp Manuel Antonio e que conta co impulso e colaboración do Concello de Vigo a través das concellerías de educación e normalización lingüística.

 O parque de Castrelos acollerá o xoves 15 de maio, de 10:00 a 13:00 h. a preto de 426 alumnos, de distintos niveis, de centros educativos de Vigo, Porriño e Redondela que, a través de lecturas compartidas, cancións, poesias e actuacións diversas, renderán unha homenaxe ao libro e á lectura nestas datas tan sinaladas para as letras galegas. 

O acto de clausura será conducido por Uxía Blanco.

 Por parte do CEP Santa Mariña participarán 54 alumnos de 4º de primaria acompañados polos seus profesores. A Biblioteca Municipal, que participa anualmente nas Xornadas de Bibliotecas de Vigo e Bisbarra nas que naceu a semente desta actividade, estará representada polos seus responsables.

Kamishibai nos centros escolares co Obradoiro Empregaverde de Redondela

A colaboración das Bibliotecas Municipais de Redondela co grupo de Dinamización Cultural e Actividades de Tempo Libre do Obradoiro Empregaverde, ven de dar os seus froitos.

 Tralo obradoiro de Kamishibai que celebramos as bibliotecas na Aula de formación de Pousadouro, o alumnado deste curso traballou na elaboración do seu propio conto de kamishibai, adaptando o conto de Rato Tom e Rata Tomasa, da editora Oqo.

O certo é que o resultado non pudo ser mellor. O conto quedou fermoso, tenro e moi simpático, cunhas ilustracións moi coloristas e animadas.

Xa rematado, tocaba a "estrea", e foron dous centros de ensino de Chapela os que puderon gozar da experiencia.

O CEIP de Laredo, a primeira hora desta mañá.

 

O CEIP da Igrexa, a finais da mañá.

 

 

Ademáis, os escolares fixeron os seus debuxos dos personaxes do conto, inventando os finais que mais lles gustaran.

No Ceip Laredo:

 No Ceip Igrexa:

Mañá estes contadores noveis do Obradoiro Empregaverde recibirán a un centro de Educación Infantil na Biblioteca Municipal de Redondela, e agardamos que a experiencia sexa tan boa como a de hoxe. A eles queremos agradecerlles moitas cousas, pero sobre todo, a elaboración dun conto tan fermoso como este, e tamén a graza con que llelo contaron aos cativos de Redondela.

Ademáis, o conto pasará a formar parte dos fondos das Bibliotecas Municipais de Redondela, para que outros usuarios podan gozar del.

Grazas polo voso traballo, sodes uns artistas!

Teatro de sombras co CEIP Igrexa na Biblioteca de Chapela

Despois da sesión de teatro de sombras no CEIP Laredo e mais da visita á biblioteca do CEIP Alexandre Bóveda á nosa biblioteca, tiñamos moita gana de recibir tamén aos nosos amigos de Infantil do CEIP Igrexa de Chapela.

 

 

Os cativos foron recibidos polo alumnado do CS de Educación Infantil do IES Chapela para facerlles unha nova sesión de teatro de sombras, que preparamos na sala de adultos da biblioteca.

O mariñeiro Currás

En busca de Matías

El pollito Pío

Ao rematar, dúas alumnas léronlles tamén os contos de O Sacapenas e mais La Ratita Presumida.

Remataron a visita achegándose a unha seleccón de contos que lles preparamos dende a biblioteca, e  se despediron escoitando unha canción tradicional por parte do alumnado do IES Chapela.

Achegarse aos contos gustoulles moito, non hai dúbida, porque moitos dos rapaces se achegaron coas súas familias á biblioteca na mesma tade de onte, para facerse socios e levar libros á casa.

A actividade forma parte dunha liña de colaboración entre as bibliotecas escolares dos centros, as Bibliotecas municipais de Redondela e mais o CS de Educación Infantil do IES Chapela. O espectáculo de teatro de sombras desenvolveuse tamén en dúas sesións (14 de Abril e 21 de Abril) para público familiar na Biblioteca de Chapela durante o pasado mes de Marzo.

Visita do CEIP Alexandre Bóveda á Biblioteca de Chapela

Esta mañá de luns, bendecidos polo bo tempo e o sol, pudemos recibir na Biblioteca de Chapela a uns visitantes moi especiais, que se achegaron ás nosas instalacións camiñando dende o seu colexio.

 

Estes convidados a visitar a nosa biblioteca non eran outros que o alumnado de Infantil do CEIP Alexandre Bóveda, que se achegaron á biblioteca para gozar dunha sesión moi fermosa de teatro de sombras, a cargo do alumnado do CS de Educación Infantil do IES Chapela.

 

A actividade forma parte da serie de espectáculos de teatro de sombras que este alumnado está a ofrecer na biblioteca durante este mes, e se realiza para visitas escolares grazas á colaboración da biblioteca municipal coas bibliotecas dos centros de ensino. A pasada semana tamén lles achegaron estes contos en sombras ao CEIP Laredo.

Xunto cos espectáculos de sombras:

- O mariñeiro Currás

- El cuento de Matías

- El pollito Pío

Contáronnos tamén o conto de Boubou e o elefante Bembé, e cantamos algunha canción.

Finalmente os rapaces puderon achegarse aos libros, cunha selección de contos que lles tiñamos preparados para a ocasión.