Moitas grazas a todos os compañeiros que nos axudaron, nestes anos, coa loxística no desenvolvemento de moitas das nosas actividades, especialmente coas referentes ao mundo da banda deseñada.

Gozade coa lectura!

Que contentos que estamos!

O proxecto de dinamización lectora presentado pola nosa biblioteca, Bibliocaravana: III Semana do Libro a festa das palabras,  foi seleccionado pola comisión de avaliación de proxectos da Campaña de Animación á Lectura María Moliner. Así, con data 13 de decembro de 2011 a Subdirección Xeral de Promoción do Libro, a Lectura e as Letras Españolas ditou a proposta de resolución definitiva pola  que  convertémonos en beneficiarios dun lote de 200 libros.

          Grazas a todos os que colaboraron con nós no seu desenvolvemento: aos Centros Educativos de Infantil e Primaria de Redondela, ao Servizo de Normalización Lingüística do Concello, aos alumnos de 2º curso do Ciclo Superior de Educación Infantil do I.E.S. Chapela, a Protección Civil, a Andrea e a todo o persoal da Biblioteca.

 GRAZAS A TODOS desde a Biblioteca Municipal e a Axencia Municipal de Lectura de Chapela e PARABÉNS a todos os agraciados, de forma especial aos compañeiros  das bibliotecas de Tuéjar (Valencia),  Pozoblanco (Córdoba) e Oleiros (A Coruña).

Premiado no sorteo da biblio-caravana das Bibliotecas de Redondela

Roberto recolleu onte o seu premio. Comentounos que "pesaba moito"

Roberto Castro Viaño resultou o gañador do sorteo da biblio-caravana das bibliotecas de Redondela.

Durante a súa estadía na Alameda de Chapela e no Multiusos de Redondela, a biblio-caravana dispuña dunha urna para que os participantes votaran polo seu libro preferido.

O gañador do sorteo achegouse onte á biblioteca de Chapela, onde recolleu o seu premio.
Noraboa!!

Rematamos no Colexio Vigo

Hoxe terminou o seu periplo polos centros educativos a caravana da III Semana do Libro. Fíxoo no Colexio Vigo e coa nosa compañeira Mª José de contacontos.
Moitas grazas a todos pola vosa acollida tan cariñosa e aos alumnos do 2º curso do Ciclo Superior de Educación Infantil do I.E.S. Chapela pola vosa dedicación e entrega.

Ata o Día do Libro do ano que vén!

A Bibliocaravana achegouse ao CEP de Redondela

Día 29 no CEP de Redondela

Hospedámonos no Alexandre Bóveda

Día 28 no CEIP Alexandre Bóveda

Estacionamos en Laredo

Día 27 no CEIP de Laredo

Chegamos a Santo Paio de Abaixo!!

Día 26 de abril no CEIP de Santo Paio de Abaixo

Estacionamos en Igrexa-Chapela

ía 15 no CEIP da Igrexa-Chapela

Unha nova xornada no percorrido da biblio-caravana que as Bibliotecas de Redondela e mais o Servizo de Normalización Lingüística botaron adiante para promocionar o libro durante este mes.

Hoxe nos acompañou Graciela, alumna do Ciclo Superior de Educación Infantil do I.E.S. Chapela, que lles contou un fermoso conto aos máis pequenos.

Nova escala: Cedeira

ía 14 no CEIP de Cedeira con Ariana contaconteando

A biblio-caravana das Bibliotecas de Redondela e máis de Normalización lingüística fixo en Cedeira a súa 4ª parada para celebrar o Día do Libro con todos os centros escolares.

Ariana, alumna do I.E.S. Chapela (Ciclo Superior de Educación Infantil) achegoulles un conto aos máis cativos do cole.

Terceira Parada: Porto Cabeiro

Día 13 no CEIP de Porto Cabeiro

A Biblio-caravana das Bibliotecas de Redondela e máis de Normalización Lingüística achegouse hoxe a un novo centro escolar: o C.E.I.P. Porto Cabeiro.

As Bibliotecas de Redondela agasallaron ao centro cun contacontos para os máis cativos.

III Semana do Libro: A festa das palabras. A biblio-caravana nas alamedas

Para festexar o Día do Libro, durante os días laborables de Semana Santa teremos nas alamedas de Chapela e de Redondela a magnífica Biblio-caravana das Bibliotecas de Redondela e máis de Normalización Lingüística.

Nenos e maiores poderedes achegarvos a ela e pasar un bo rato de lectura e, tamén, de visionado de curtametraxes.

Luns 18 de Abril, de 11:30 a 13:30 h., na Alameda de Chapela
Martes 19 e Mércores 20 de Abril, de 11:30 a 13:30 h., na Alameda de Redondela

Segunda parada: Outeiro das Penas

Día 12 no CEIP Outeiro das Penas Picade nas imaxes para amplialas

A Biblio-caravana das Bibliotecas de Redondela e máis de Normalización Lingüística achegouse hoxe a un novo centro escolar: o C.E.I.P. Outeiro das Penas.

Xunto con ela, Beatriz, alumna do Ciclo Superior de Educación Infantil do I.E.S. Chapela, achegouse ao centro para contarlles aos rapaces e rapazas un conto.

Primeira parada: Quintela

Picade nas imaxes para amplialas

Día 11 no CEIP Quintela

A Biblio-caravana das Bibliotecas de Redondela e mais de Normalización lingüística fai no C.E.I.P. Quintela a primeira parada do seu periplo polos centros escolares do concello.

Vanesa e Rosalía, alumnas do Ciclo Superior de Educación Infantil do I.E.S. Chapela achegáronnos dous fermosos contacontos.

III Semana do Libro: a festa das palabras

O mes de abril é certamente especial para todos aos que nos gusta ler: celebramos o Día Internacional do Libro Infantil e Xuvenil o 2 de abril, o 23 agárdanos o Día do Libro,.. e nós (as Bibliotecas de Redondela e o Servizo de Normalización Lingüística) embarcámonos un ano máis na nosa Semana do Libro: a festa das palabras, xa na súa terceira edición.

...e como é bo cambiar, este ano, en vez de saír a rúa con mesas e expositores, liámonos a manta á cabeza, collemos unha caravana (que nos prestou amablemente Protección Civil) e botámonos aos camiños. Iso sí, facendo paradas en lugares marabillosos:

Hoxe, luns, 11 de abril no CEIP Quintela
Mañá, martes, 12 de abril no CEIP Outeiro das Penas
O mércores, 13 de abril imos para o CEIP Porto Cabeiro
O Xoves, 14 de abril, parada no CEIP de Cedeira
O Venres, 15 de abril no CEIP Igrexa - Chapela.
O 26 de abril no CEIP Santo Paio de Abaixo
O 27 de abril no CEIP de Laredo
O 28 de abril no CEIP Alexandre Bóveda
O 29 de abril no CEP Santa Mariña
Maio no Colexio Vigo
E preguntarédesme... que pasa cos días 18, 19 e 20? Eses dias laborables da Semana Santa o vehículo abrirá as súas portas en horario de mañá, para nenos e adultos, nas alamedas de Chapela (18 e 19 de abril) e Redondela (20 de abril) sobre as 11:00 h.
E voltaredes a preguntar: pero, que leva a caravana? O maior dos tesouros: libros!!!

Libros das bibliotecas e libros de institucións de toda a xeografía española que esforzadamente conseguíu Eva de Normalización Lingüística. Estes organismos fixeron xenerosas doazóns de obras nas súas linguas para que vexamos a riqueza lingüística que existe en todo o noso territorio.
Ben, pois iso non é todo!!! Como actividade complementaria, e a modo de agasallo para todos neste mes, os alumnos de 2º curso do Ciclo Superior de Educación Infantil do I.E.S. Chapela desenvolverán unha actividade de contacontos para os rapaces de entre 3 e 6 anos en todos estes colexios.

E para que todo se entenda moi ben e moi clariño, Normalización Lingüística elaborou un díptico informativo sobre as linguas expostas e un pequeno glosario de termos multilingüe.

Agardamos que vos guste a todos

Aquí e aquí, deixámosvos o programa, do que vos iremos dando conta en próximas entradas. así como cada día colgaremos unha reportaxe gráfica da xornada.