O IES Chapela tamén se achega á exposición dos Obxectivos do Desenvolvemento Sostible

Este venres, un grupo de alumnos do Ciclo Superior de Educación Infantil do IES Chapela achegouse ao Multiúsos Piñeiral do Crego para visitar a exposición "Os Obxectivos do Desenvolvemento Sostible", organizada polo Fondo Galego de Cooperación e Solidariedade e achegada ao Multiúsos de Chapela grazas á colaboración das bibliotecas municipais.

A concelleira Teresa París, vicepresidenta do Fondo Galego de Cooperación e Solidariedade neste exercicio e concelleira responsable do mesmo en Redondela achegouse esta mañá para recibir a estes estudantes.

A exposición, formada por caixas de cartón de tamaño xigante con viñetas de ilustradores/as galegos/as e da África lusófona sorprendeu aos seus visitantes polo seu formato, e gustou polo seu contido. Cada unha das imaxes facía referencia a cadanseu obxectivo dos 17 ODS fixados por Nacións Unidas de cara a Axenda 2030.

Aínda que algunhas viñetas resultaban máis difíciles de interpretar ou de asociar cos seus respectivos ODS, a exposición gustou aos visitantes, que a consideraron unha boa ferramenta de sensibilización social e de difusión do contido dos Obxectivos do Desenvolvemento Sostible.

Dámoslles as grazas a estes alumnos pola súa visita e a Susana, a súa profesora, por incluir esta exposición dentro das actividades do módulo Expresión e Comunicación deste ciclo.

Exposición sobre os Obxectivos do Desenvolvemento Sostible no Multiúsos de Chapela grazas ao Fondo Galego

Desde o 25 de outubro e ata o 11 de novembro poderedes visitar no Multiúsos Piñeiral do Crego de Chapela, a exposición Os Obxectivos do Desenvolvemento Sostible, un camiño para acabar coa pobreza e as desigualdades alá e acolá.

A mostra achéganos, a través dun formato novidoso: 17 grandes estruturas de cartón ilustradas con cadansúas viñetas representativas dos Obxectivos do Desenvolvemento Sostible (ODS). 

Os ODS, fixados por Nacións Unidas dentro da Axenda 2030, son obxectivos que buscan erradicar a pobreza, a fame, as desigualdades e a destrución do planeta, e se plantexan tanto como unha meta na acción global e internacional como obxectivos no contexto máis próximo e local, a todos os niveis.

As viñetas da exposición foron elaboradas por 15 ilustradores e ilustradoras, tanto galegos como de países africanos da Lusofonía como son Mozambique, Cabo Verde e Guinea-Bissau.

Dita exposición, organizada e coordinada polo Fondo Galego de Cooperación e Solidariedade poderá visitarse no noso municipio grazas á colaboración das Bibliotecas Municipais de Redondela.

As bibliotecas municipais de Redondela colaboran e participan nesta exposición polo seu especial interese en difundir estes obxectivos, pero tamén como un xeito de reivindicar a súa e labor social como institucións, xa que o traballo de cara a estas metas forma parte da misión primordial das bibliotecas.

O Fondo Galego de Cooperación e Solidariedade está formado por case 100 concellos e diputacións galegas, que cooperan xuntos para levar adiante iniciativas de cooperación e solidariedade con enfoque de Dereitos Humanos cos países menos desenvolvidos ou máis empobrecidos. Actualmente o Concello de Redondela ocupa a vicepresidencia do mesmo. 

Animámosvos a visitar a exposición e a aprender sobre como podemos, cada un de nós, participar na mellora do noso mundo local e global.

"Tí tamén contas" solidariedade e valores éticos nun espectáculo para escolares co Fondo Galego de Cooperación

Esta mañá as bibliotecas municipais aliámonos co Fondo Galego de Cooperación e Solidariedade para ofrecer un espectáculo de narración oral ao público escolar de Chapela. A actividade, que tivo lugar no auditorio do Piñeiral do Crego da parroquia, celebrouse hoxe, como un xeito de destacar esta data,  17 de outubro, xa que está sinalada na Axenda da ONU como o Día Internacional para a Erradicación da Pobreza.

O alumnado de 2º ciclo de primaria dos centros:

- CEIP Alexandre Bóveda

- CEIP Igrexa Chapela

- CEIP Laredo

- Colexio Vigo

e tamén un grupo de usuarios do C.A.P.D. de Chapela, acompañado dos seus monitores, gozaron dos contos de Marta Ortiz e Brais das Hortas, A Tropa de Trapo, e participaron na invitación á reflexión e ao debate que dita actividade leva parella.

Escolares e adultos asistentes gozaron de este novo enfoque narrativo para abordar de xeito atractivo pero crítico as as inxustizas dun mundo globalizado e desigualmente repartido. 

Agradecemos a súa participación a todos os centros que asistiron esta mañá, e sobre todo ao Fondo Galego de Cooperación e Solidariedade por ternos ofrecido esta mañá tan fascinante de contos, xogo e historias.

O Fondo Galego de Cooperación e as Bibliotecas Municipais de Redondela ofrecerán mañá un espectáculo de narración oral para centros de ensino en Chapela

Mañá mércores, o auditorio do Multiúsos de Chapela recibirá aos centros de ensino da contorna para un espectáculo de narración oral.

O Fondo Galego de Cooperación e Solidariedade, en colaboración coas Bibliotecas Municipais ofrecerá á rapazada de segundo ciclo dos centros:

- CEIP Alexandre Bóveda

- CEIP Igrexa Chapela

- CEIP Laredo

- Colexio Vigo

así como a un grupo de usuarios adultos do CAPD de Chapela,

o contacontos "Tí tamén contas", da man do dúo A Tropa de Trapo.

Formado por Marta Ortiz e Brais Hortas, ensinantes de formación e contadores expertos, este grupo teatral leva máis de 12 anos percorrendo toda Galicia cos seus espectáculos de narración e sensibilización social.

A actividade enmárcase dentro da conmemoración do Día Internacional para a Erradicación da Pobreza, que se recorda, segundo a axenda da ONU, todos os 17 de outubro. A actividade é así un xeito de introducir aos asistentes no coñecemento dun dos problemas mundiais, dos que segue a ser acuciante a súa resolución, e que está recollido como o primeiro na Axenda dos Obxectivos do Desenvolvemento Sostible (ODS), de Nacións Unidas.

O espectáculo ten xa completado o seu aforo cos centros asistentes. Non hai entradas dispoñibles.

Recibimos a unha técnica mozambicana nas nosas bibliotecas, a través do Fondo Galego de Cooperación

Preme na imaxe para ver fotografías

Aínda sumida no festexo do 50 aniversario, a biblioteca municipal de Redondela recibiu hoxe unha visita formativa grazas ao estreito vínculo que temos co Fondo Galego de Cooperación e Solidariedade.

Antes de nada, facemos unha pequena introdución:

Ao longo deste mes o Fondo Galego está a desenvolver o seu programa Vacacións con Traballo en Galicia, a través do cal unha traballadora dos países parceiros do Fondo Galego no Sur se achega aos nosos municipios para coñecer o traballo en diferentes áreas técnicas, informarse dos proxectos que se están a realizar nos nosos concellos e intercambiar coñecementos técnicos cos respectivos traballadores.

A mozambicana Elsa Dimande, traballadora social da Asociación de Municipios Mozambicanos (ANAMM), é a participante deste ano en dito programa. Xunto coas aprendizaxes técnicas que tiña previsto reforzar na súa visita aos concellos galegos, entre os que destacan a igualdade de xénero, o traballo social con nenos ou o asociacionismo feminista, interesouse tamén polo traballo das bibliotecas. O seu interese ten que ver coa planificación da apertura dunha futura bibilioteca na sede da organización supramunicipal na que traballa.

Encontro a través de dúas experiencias que se irmandan...

Inmediatamente os técnicos do Fondo Galego pensaron na Biblioteca de Redondela como un lugar axeitado para esta aprendizaxe, xa que

1- O Concello de Redondela é un dos integrantes do Fondo Galego, levando actualmente a súa vicepresidencia, da man da concelleira Teresa París.

2- A nosa compañeira María José, auxiliar da Biblioteca de Chapela, tamén participou no programa Vacacións con Traballo, hai tres anos, no que se desprazou a un municipio de Cabo Verde para axudar na organización da súa biblioteca.

Así que hoxe, tiñamos visita...

Elsa Dimande interesouse polas labores fundamentais para a posta en marcha dunha biblioteca, a organización dos fondos, ou moitas cuestións técnicas bibliotecarias, sobre as que estableceu un diálogo cos nosos traballadores. O contacto futuro entre ela e compañeiros da biblioteca redondelana quedou fixado, de xeito que, no que podamos, tentaremos apoiar ese proxecto mozambicano a través do noso apoio e asesoramento remoto.

Elsa tamén coñeceu as actividades que estamos a realizar dentro da celebración do noso 50 aniversario, e desexounos moitos éxitos e parabéns por ter chegado a esta efeméride.

Dende aquí mandamos o noso apoio a Elsa Dimande e ao proxecto de biblioteca da Asociación de Municipios Mozambicanos. Agardamos novas nun futuro próximo sobre o mesmo.

Grazas Elsa Dimande e grazas a Carmen Novás, do Fondo Galego de Cooperación, pola vosa visita.

Participamos nas xornadas sobre a axenda de desenvolvemento sustentable organizadas para persoal de bibliotecas

Os participantes fotógráfanse xuntos ao rematar a xornada

As bibliotecas de Redondela estivemos representadas nas xornada de traballo As bibliotecas como aliadas na consecución dos obxectivos de desenvolvemento sustentable e a Axenda 2030, unha iniciativa da IFLA (a Federación Internacional de Bibliotecas) enmarcada no International Advocacy Programme (IAP). O IAP é un programa de acción e sensibilización que IFLA dirixe ás asociacións nacionais para que á súa vez traballen coas asociacións e profesionais de cada un dos países. 

Deste xeito unha asociación nacional de bibliotecarios FESABID (Federación Española de Sociedades de Archivística, Biblioteconomía, Documentación e Museística) foi a encarregada de realizar este obradoiro, xunto con BAMAD Galicia, a asociación correspondente de ámbito galego. O obradoiro realizouse na biblioteca Ágora de A Coruña.

Temos que dicir que estamos moi agradecidos por participar, xa que as impresións foron moi boas. Realizamos unha serie de actividades para coñecer e familiarizarnos coa Axenda 2030 da ONU e os seus 17 obxectivos, e para valorar como as bibliotecas podemos aportar o noso gran de area nesta mellora colectiva para as nosas sociedades.

O Fondo Galego de Cooperación, que leva traballando a fondo con esta axenda de obxectivos tamén estivo presente na actividade.

Grazas por todo a Bamad Galicia e mais a Fesabid por facelo posible.

Velaquí as conclusións da xornada de aprendizaxe e traballo.

O Fondo Galego de Cooperación achega con "O Valo" o Día Internacional da Paz aos escolares de Chapela

Os protagonistas de "O Valo" achéganse ao público presente no auditorio

Un total de 127 alumnos de Primaria dos centros de ensino de Chapela acudiron esta mañá ao Multiúsos do Piñeiral do Crego para ver a obra teatral ‘O valo’, creada por Pallasos en Rebeldía para o Fondo Galego de Cooperación e Solidariedade.

O Fondo Galego ven de incorporar este espectáculo ao do seu programa de formación e sensibilización á poboación dos seus concellos socios. O obxectivo é evitar o esquecemento das guerras e da xente que delas foxen, ao tempo que se convida a transformar a realidade pensando un mundo diferente. Todo elo enmarcado na véspera do Día Internacional da Paz, data sinalada na axenda das Nacións Unidas para o 21 de Setembro.

Un momento da obra

A obra:
Dous actores interveñen no espectáculo ‘O valo’, baseado no texto homónimo que lle valeu a Carlos Labraña o Premio Manuel María de Literatura Dramática Infantil. A proposta representa o encontro entre unha nena que escapa da guerra e un rapaz soldado, gardián devoto de fronteiras móbiles. 

Momento da obra, na representación desta mañá

Cómpre ter en conta que o conflito en Siria obrigou a máis de cinco millóns de persoas a abandonar o país na procura de refuxio noutros lugares, entre as que se achan moitas menores. ‘O valo’ é unha obra escrita en homenaxe a todas elas, para que as teñamos presentes e as súas vidas constitúan o xerme da loita contra todos os valados, muros e fronteiras que separan os seres humanos.

O Fondo Galego de Cooperación e Solidariedade está integrado por 90 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur. Recoñecido como axencia municipal da cooperación galega, o Fondo Galego de Cooperación e Solidariedade chega en 2017 ao seu vixésimo aniversario.

Libros para o Día Internacional da Paz, seleccionados pola biblioteca para a actividade

A biblioteca de Chapela, como colaboradora na actividade, elaborou un centro de interese con libros para rapaces e sobre a temática da inmigración, a guerra ou os refuxiados. Este será enviado aos centros escolares participantes, para que podan seguir traballando a temática co seu alumnado.

• A nova en Radio Redondela.
• A nova no Faro de Vigo.

O Fondo Galego de Cooperación celebra o Día da Paz cun espectáculo para os escolares de Chapela

- Pallasos en Rebeldía creou a obra ‘O valo’ para os concellos socios do Fondo Galego de Cooperación e Solidariedade a partir dun texto de Carlos Labraña

- A actividade, organizada polo Fondo Galego de Cooperación e Solidariedade, conta coa colaboración das bibliotecas municipais.

Promover a reflexión sobre as fronteiras e a situación das persoas refuxiadas é a finalidade do novo espectáculo de clown creado por Pallasos en Rebeldía para o Fondo Galego de Cooperación e Solidariedade. A peza ‘O valo’ , representarase este mércores 20 de setembro, ás 12 horas, no multiusos de Chapela. Alumnado de Primaria dos tres centros de ensino da parroquia chapelana achegarase a ver a obra, na xornada previa ao Día Internacional da Paz. O obxectivo é evitar o esquecemento das guerras e da xente que delas foxen, ao tempo que se convida a transformar a realidade pensando un mundo diferente.

Dous actores interveñen no espectáculo ‘O valo’, baseado no texto homónimo que lle valeu a Carlos Labraña o Premio Manuel María deLiteratura Dramática Infantil. A proposta representa o encontro entre unha nena que escapa da guerra e un rapaz soldado, gardián devoto de fronteiras móbiles. Cómpre ter en conta que o conflito en Siria obrigou a máis de cinco millóns de persoas a abandonar o país na procura de refuxio noutros lugares, entre as que se achan moitas menores. ‘O valo’ é unha obra escrita en homenaxe a todas elas, para que as teñamos presentes e as súas vidas constitúan o xerme da loita contra todos os valados, muros e fronteiras que separan os seres humanos.

Poio, Laxe, Redondela, San Sadurniño, Ames, A Guarda, Caldas, Ourense, Cabanas e A Coruña son os municipios socios do Fondo Galego de Cooperación e Solidariedade que acollerán antes de finais de ano esta actuación, cofinanciada pola Xunta de Galicia. Pallasos en Rebeldía defínese coma un espazo do teatro galego para traballar a cooperación internacional a través da risa. Xurdida nunha visita a Chiapas en 2004, considera que o clown desenvolve unha función protectora de valores sociais como a crítica, o dereito a rir que tamén teñen as persoas máis desfavorecidas ou a superación dos nosos complexos mediante a cura da gargallada.

O Fondo Galego de Cooperación

O Fondo Galego de Cooperación e Solidariedade está integrado por 90 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur. Recoñecido como axencia municipal da cooperación galega, o Fondo Galego de Cooperación e Solidariedade chega en 2017 ao seu vixésimo aniversario.

Redondela celebra o 20 aniversario do Fondo Galego de Cooperación

O Fondo Galego de Cooperación e Solidariedade cumpre 20 anos neste 2017. Para festexalo, a exposición "20 anos a Fondo coa solidariedade" está a percorrer os concellos que compoñen esta asociación municipalista, e nestes días está en Redondela.

A exposición pode verse na Praza do Concello

Dende o pasado 19 de xullo e ata o xoves 10 de agosto os veciños e visitantes poderán achegarse á Praza do Concello de Redondela para vela.

Unha exposición moi didáctica e cun deseño moi atractivo, marca do noso benquerido Pepe Carreiro, coñecido non só polos seus famosos contos dos Bolechas, senón por ser o autor do deseño da Coca Simona do noso municipio.

A exposición explica que é o Fondo Galego de Cooperación, como se constituiu esta asociación, da que na actualidade o noso concello ocupa a vicepresidencia. Tamén nos achega cal é o seu traballo para cooperar en proxectos solidarios en diferentes partes do mundo, así como para sensibilizar á nosa poboación da necesidade e as vantaxes de facer un mundo máis xusto e equilibrado.

O alcalde de Redondela, Javier Bas, e a concelleira de cultura e vicepresidenta
do Fondo Galego, Teresa París, na inauguración da exposición

Entre os seus paneis podemos atopar o texto fundacional da asociación, escrito por Carlos Casares, homenaxeado das Letras Galegas este ano.

Texto de Carlos Casares no panel inicial da exposición

As bibliotecas municipais colaboramos con esta exposición no noso Concello.

Ver a nova sobre a exposición en Faro de Vigo.

A Interculturalidade, proposta bibliográfica... participación fotográfica

Aínda que a exposición "Imaxes con Fondo" do Fondo Galego de Cooperación xa rematou no Multiúsos do Piñeiral do Crego, na Biblioteca de Chapela continuamos a amosarvos unha pequena selección de libros, de temáticas diversas, pero nos que a perspectiva intercultural está moi presente.

Queremos así animarvos e motivarvos para participar na III edición do concurso Imaxes con Fondo. Podedes presentar as vosas propostas ata o 15 de Outubro.

Lembramos que:

• Este ano 2016 o concurso xira en torno á INTERCULTURALIDADE. 
• Como novidade, o concurso presenta este ano dúas seccións: fotografía e vídeo. 
• Hai dúas categorías para participar, segundo idades: 

        - Xuvenil, para persoas de 14 a 17 anos.
        - Adultos: persoas a partir de 18 anos. 

• Unha viaxe a Mozambique, unha cámara de fotografía e vídeo ou unha cesta de produtos de comercio xusto entre os premios. 
• O enderezo para presentar as fotografías/vídeos participantes é imaxesconfondo@gmail.com. 
• O prazo remata o Sábado 15 de Outubro.

CONSULTADE AQUÍ AS BASES DO CONCURSO

Felipe Carnotto fala do seu traballo fotográfico co alumnado do IES Chapela

F. Carnotto durante a súa charla co alumnado do IES Chapela, no auditorio do Multiúsos

VER AQUÍ AS IMAXES DA ACTIVIDADE

O Fondo Galego de Cooperación e Solidariedade está moi presente nestes días nas bibliotecas municipais, concretamente na biblioteca de Chapela.

A exposición "Imaxes con Fondo" no Multiúsos de Chapela

Como xa vos vimos contando, durante todo este mes podedes ver a exposición que eles nos traen: "Imaxes con Fondo" no Multiúsos do Piñeiral do Crego. 

Lembrámosvos que o horario para visitala é de Luns a Venres, de 16:30 a 22:30 h.

A exposición recolle unha serie de fotografías, acompañadas de textos explicativos, que enviaron mozos/as e adultos/as galegos para participar no concurso "Imaxes con Fondo", organizado pola mesma entidade, no ano 2012.

E para falar de fotografía, e particularmente de fotografía social, nada mellor que contar cun experto na materia. Grazas, novamente, ao Fondo Galego, o fotógrafo Felipe Carnotto, reporteiro gráfico freelance e gañador do concurso "Imaxes con Fondo II" (2014), desprazouse esta mañá ata o Multiúsos do Piñeiral do Crego para ter un encontro co alumnado da Familia Profesional de Servizos á Comunidade do IES Chapela. 

Felipe Carnotto posa con Leolo, a mascota das bibliotecas, na exposición do Multiúsos de Chapela

Carnotto amosounos o seu traballo en diferentes contextos, e contounos como o aborda el, non só dende a perspectiva técnica da fotografía, senón na súa vertente humana e informativa.

Felipe Carnotto durante a súa exposición

Un dos aspectos máis interesantes son as reportaxes que desenvolveu cos refuxiados da guerra de Siria. Neste caso traballou tanto o enfoque dende a fronteira dos Balcáns, onde miles de persoas desprazadas percorreron esta ruta na fuxida dos conflitos armados dos seus países de orixe, como dende os migrantes xa asentados en países europeos, no seu camiño pola integración.

Tamén nos amosou outros traballos, como contextos de marxinalidade e drogas na nosa contorna, nunha reportaxe que realizou no Barrio do Cura en Vigo. 

Por último, coñecimos a súa experiencia na comunidade rural de Somoto, en Nicaragua, viaxe que pudo facer co Fondo Galego de Cooperación, tras acadar o premio na II edición do concurso Imaxes con Fondo.

Fotografía de Felipe Carnotto coa que en 2014 gañou o concurso "Imaxes con Fondo II" 

Na web de Felipe Carnotto podedes achegarvos ao seu traballo como fotógrafo.

E ao rematar a presentación do noso poñente, visitamos tamén a exposición "Imaxes con Fondo", para animar aos nosos visitantes de hoxe a participar no concurso de fotografía.

Os participantes na charla visitan a exposición "Imaxes con Fondo"

Este ano o Fondo Galego de Cooperación ten aberto xa a súa III Edición do concurso "Imaxes con Fondo".

Lembramos que:

• Este ano 2016 o concurso xira en torno á INTERCULTURALIDADE. 
• Como novidade, o concurso presenta este ano dúas seccións: fotografía e vídeo. 
• Hai dúas categorías para participar, segundo idades: 

        - Xuvenil, para persoas de 14 a 17 anos.

        - Adultos: persoas a partir de 18 anos. 

• Unha viaxe a Mozambique, unha cámara de fotografía e vídeo ou unha cesta de produtos de comercio xusto entre os premios. 
• O enderezo para presentar as fotografías/vídeos participantes é imaxesconfondo@gmail.com. 
• O prazo remata o Sábado 15 de Outubro.

CONSULTADE AQUÍ AS BASES DO CONCURSO

Dende as bibliotecas municipais de Redondela animámosvos a todos a participar.
Para que serva de inspiración, propoñémosvos a nosa selección de libros infantiles e xuveniles sobre a interculturalidade. Podedes consultalos, e levalos en préstamo, na Biblioteca de Chapela.

Felipe Carnotto, coas mascotas Leolo e Gato co noso centro de interese sobre a Interculturalidade

Imaxes con Fondo: exposición fotográfica e concurso co Fondo Galego de Cooperación e a Biblioteca de Chapela

O Multiúsos de Chapela inaugura hoxe a exposición fotográfica "Imaxes con Fondo", organizada polo Fondo Galego de Cooperación e Solidariedade.

A exposición, que naceu do concurso de fotografía co mesmo nome,  pretende promover a reflexión, o pensamento crítico e un cambio de actitude dentro da nosa sociedade, por medio da palabra e a imaxe.

A mostra consiste nunha serie de fotografías que, acompañadas de textos explicativos, enviaron mozos e adultos galegos e galegas para participar o antedito concurso.

O Fondo Galego botou a andar en 2012 o concurso Imaxes con Fondo como ferramenta para promover a reflexión e un cambio de actitude na cidadanía, apostando por condutas solidarias e respectuosas coa contorna do planeta e coas persoas que nel habitan. Froito desta experiencia naceu a exposición itinerante 'Imaxes con Fondo', que recolle as mellores obras presentadas. 

• Este ano 2016 está aberta a 3ª edición do concurso, que xira en torno á INTERCULTURALIDADE.

• Como novidade, o concurso presenta este ano dúas seccións: fotografía e vídeo.

• Podedes participar en dúas categorías:

          - Xuvenil: persoas de 14 a 17 anos.

          - Adultos: persoas a partir de 18 anos.

• Entre os premios do concurso poderedes optar a unha viaxe a Mozambique, unha cámara de fotografía e vídeo ou unha cesta de produtos de comercio xusto.

• O prazo para presentar as vosas propostas remata o 15 de Outubro. O enderezo para presentalas é imaxesconfondo@gmail.com

Lembramos, que o gañador da primeira edición do concurso (2012) na categoría de persoas adultas, Rober Amado, viaxaría a Cabo Verde para realizar unha mostra fotográfica sobre os 11 anos de traballo do Fondo Galego no arquipélago africano, exposición que xa pudemos contemplar no Multiúsos de Chapela.

O gañador na mesma categoría da segunda edición do concurso (2014), Felipe Carnotto, desprazouse a Nicaragua para facer unha mostra fotográfica, exposición que o Fondo Galego está xa exhibindo ao longo da xeografía galega.

A biblioteca de Chapela contará con este último, o fotógrafo Felipe Carnotto, que fará un obradoiro de fotografía solidaria co alumnado da Familia Profesional de Servizos á Comunidade do IES Chapela. 
Dito obradoiro terá lugar na mañá do vindeiro xoves 22.


Agardamos que a exposición vos guste. Animádevos tamén a participar no concurso Imaxes con Fondo deste ano! Tedes ata o 15 de Outubro!

BASES DO CONCURSO