lunes, 11 de abril de 2016

O Día do Libro dedicado a Manuel María en Redondela

O Servizo de Normalización Lingüística, en colaboración con Radio Redondela e mais con nós, as Bibliotecas Municipais de Redondela, organizamos a celebración do DÍA DO LIBRO dedicada a Manuel María.


 Co gallo da celebración, o vindeiro 23 de abril, do DÍA DO LIBRO, e a dedicación este ano do día das Letras Galegas 2016 ao escritor chairego Manuel María, estes departamentos organizan unha celebración conxunta que consistirá na lectura e gravación de textos do autor homenaxeado en Radio Redondela, entre o 12 e o 15 de abril (en horario de 13 a 14:30 h), e a posterior emisión na emisora municipal entre o 18 e o 22 de abril, vésperas da celebración.

Tamén existe a posibilidade de que aquelas persoas que non poidan achegarse á Radio Municipal a facer as gravacións, ou aqueles centros educativos que xa teñan feito co seu alumnado agunha gravación, poidan envialas por correo electrónico en formado MP3 a radioredondela@hotmail.com para a súa posterior emisión.

A emisora municipal ten á disposición das persoas que se acheguen algúns exemplares de libros de Manuel María, que poderán utilizar para a lectura e gravación.

A actividade responde a unha proposta da Fundación Manuel María: "Manuel María na túa voz", coa que se pretende espallar a lectura pública de textos de Manuel María para este día do libro.

O SNL, Radio Redondela e as Bibliotecas Municipais animan a toda a cidadanía a que participe nesta celebración poñendo voz propia á palabra escrita do poeta da fala.

Como dicía Manuel María en 1968 (Os soños na gaiola):

Galiza somos nós:
a xente e mais a fala.
Si buscas a Galiza
en ti tes que atopala!

Ademáis, a biblioteca de Chapela ofrecerá un contacontos adicado a Manuel María. Será o mércores 20, ás 18:30 h.,  cos contadores Polo correo do Vento.
Publicar un comentario