martes, 31 de mayo de 2016

Récord de usuarios nas bibliotecas municipais con máis de 40.000 visitantes

As bibliotecas de Redondela dende o exterior
As Bibliotecas Municipais de Redondela son noticia nestes días polos datos do uso das mesmas no 2015, e que foron contabilizados na elaboración das Estatísticas das bibliotecas públicas galegas que recolle a Rede de Bibliotecas de Galicia. 

A Biblioteca Valle-Inclán de Redondela
Comprácenos así ter constancia que a Biblioteca Municipal Valle-Inclán conforma a sexta biblioteca de titularidade municipal en prestatarios activos, e a oitava en volume de préstamos ao longo do ano 2015 de entre as 159 de toda Galicia que están inscritas no Proxecto Meiga.

En total foron 11.683 préstamos os realizados ao longo do ano pasado na Biblioteca Municipal de Redondela, aos que hai que sumar, por outra banda, os 5.290 préstamos que se contabilizaron no mesmo período na Axencia de Lectura de Chapela
 
A Axencia de Lectura Municipal de Chapela
Consultar información, levar en préstamo un libro, CD de música ou un DVD; acceder a Internet, asistir a contacontos, charlas ou obradoiros, participar nos clubs de lectura ou mesmo estudar son algúns dos motivos que levaron aos veciños a realizar un total de 41.600 visitas á Biblioteca Municipal de Redondela durante o pasado ano, o que as convirte no servizo que máis público congrega en Redondela.

Un servizo que conta con 6.247 socios inscritos na Biblioteca Valle-Inclán, aos que hai que engadir outros moitos usuarios que non contan con carné. Pola súa banda, a Axencia de Lectura Municipal de Chapela sitúase no segundo lugar de entre as 46 Axencias de Lectura contabilizadas, ao sumar 511 prestatarios activos e, xa dende estes días, máis de 2000 socios no seu total.

Unhas bibliotecas que durante o ano pasado organizaron numerosas actividades de animación á lectura: un total de 75 actos en Redondela con máis de 1040 asistentes  e 26 actividades en Chapela.

Asemade, as bibliotecas promoven tamén este servizo a través das novas tecnoloxías, con 245.106 visitas ao blog e un total de 3688 usuarios de internet na Biblioteca Municipal de Redondela.

Uns datos que nos enchen de ledicia, e que vemos reflexados nestes días en medios como:

Queremos agradecer a estes medios a difusión desta información das nosas bibliotecas. Pero sobre todo, congratularnos con todos vós, os usuarios dos nosos servizos, por formar parte destas estatísticas tan positivas e darlle vida ás nosas bibliotecas.
Publicar un comentario