Poesía, literatura e solidariedade na Biblioteca de Chapela cos Elefantes de Papel

O pasado venres a biblioteca de Chapela recibiu a presentación do libro e mais do proxecto solidario "Elefantes de Papel".

María Salinas e Berto Pirata cos carnés "axigantados"
das bibliotecas de Redondela #eubibliotecasredondela50

As circunstancias dese día (ás veces a actualidade manda) fixeron que a asistencia de público fose reducida. Porén a presentación mesma foi moi amorosa, divertida e emocionante.. e sen dúbida temos que darlles as grazas aos autores do libro, María e mais Berto, e tamén ao público alí presente, pola súa animada participación.

María Salinas falounos de como se xestou o libro: un conxunto de 52 relatos, 26 textos cada autor, e como se orixinou a idea de xuntar estes textos nun libro que se convertiría nun alento de solidariedade que percorrería un extenso territorio, chegando a facer con el un total de 52 presentacións.

A asociación Andaina presentou o proxecto que está a desenvolver
en Redondela e mais a súa contorna

O proxecto levaba consigo que en cada unha das presentacións ao público se lle daría protagonismo a unha ONG ou entidade solidaria local, que pudese á súa vez presentar o seu traballo. Neste caso foi Andaina quen coa súa valente e necesaria labor en favor da integración dos nenos con diversidade funcional, estivo presente nesta charla.

Por último o chapelano Berto Pirata falounos de todo o proxecto solidario que sostén esta publicación, e todo o periplo que ámbolos dous escritores-aventureiros están a facer a través do libro.

Berto Covelo recitou dúas poesías:
"Teño o corazón senlleiro (Viaxe ao país dos ananos)", de Celso Emilio Ferreiro
"Defenderé la casa de mi padre", de Gabriel Aresti

A presentación estivo acompañada do recitado, guitarra en man, de dúas poesías por parte de Berto Covelo, e tamén da participación do público lendo e teatralizando algúns dos textos.

Agradecemos aos autores ter contado coas nosas bibliotecas para formar parte desta cadea solidaria e agardamos moitos éxitos ao libro e ao proxecto final solidario que se vai desenvolver coa recadación do mesmo.

Na Biblioteca de Chapela temos xa un exemplar deste libro, asinado polos dous autores. Podedes achegarvos a el para somerxervos nos seus relatos breves cheos de evocacións poéticas e emocionais.

O noso Leolo co exemplar de "Elefantes de papel"
que xa temos na biblioteca

Grazas Elefantes de papel!