martes, 5 de junio de 2018

Contos para bebés. Este mes de xuño na Biblioteca de Chapela


No mes de xuño, co verán aínda por chegar, queremos recibir na biblioteca ao público máis cativo e ás súas familias. 

O mércores 13, ás 18:00 h. comprácenos recibir nas nosas instalacións aos máis pequeniños da contorna, para gozar xuntos dunha actividade de música e narración, que nos traerán Cris de Caldas e Xabi do Camiño.

Comerá o bebé? Esta dúbida fai de fío condutor desta actividade de animación á lectura. Igual que o adulto acode á súa imaxinación e aos seus recordos para atopar un momento de sosego que facilite a comida, na actividade utilízanse os contos e a música para chegar ao seu obxectivo.

Cris e Xabi levan percorrida toda Galicia cos seus contos e músicas, nun xeito de narracións musicadas, cheas de rimas, arrolos, sons e murmurios que farán as delicias dos escoitantes de contos máis novos e esixentes.

A actividade está indicada para crianzas de entre 6 meses e 3 anos.
É de balde, pero precísase inscrición para participar, dado que as prazas son limitadas. 
Podedes inscribirvos:
- Na biblioteca de Chapela, en horario de 16:00 a 21:00 de L-V
- Por teléfono, no 986-454-226, no mesmo horario
- Por correo electrónico: bibliotecachapela@redondela.gal

A actividade realízase grazas ao programa Ler conta moito, da Rede de Bibliotecas de Galicia.



Publicar un comentario