María Antonia no seu bibliobus

  Nunha entrada pasada neste blog falamos da campaña #vivalabiblio na que  os lectores manifestaban o seu amor á súa biblioteca. A campaña consistiu no envío por parte dos usuarios das bibliotecas públicas españolas dun tuit expresando a súa satisfacción no uso das bibliotecas que cada un utiliza de forma habitual.

Resultou gañador o tuit procedente do CEIP San Ildefonso, de Camponaraya, dedicado a un dos Bibliobuses do Bierzo, agradecendo especialmente o labor das persoas que traballan neste servizo, con un recordatorio especial á bibliotecaria María Antonia.

 

     Aquí, na biblioteca, fíxonos moita ilusión esta homenaxe pois tivemos a sorte de coñecer a María Antonia nun curso organizado pola Universidade de Verán Menéndez Pelayo. É unha persoa encantadora e namorada do seu traballo. De cando en vez envíanos os seus queridos bibliobuses para que nas bibliotecas de Redondela teñámolos moi presentes. Así o facemos,  compañeira.

 

             Noraboa, María Antonia e adiante co teu fantástico labor!