Divertido contacontos para bebés "Comerá o bebé?"

Preme na imaxe para ver as fotografías

 Na tarde de onte as bibliotecas de Redondela volveron revivir unha desas actividades máxicas e especiais que de cando en vez, compartimos co noso público máis novo. Crianzas de 0 a 3 anos estaban convidados a achegarse ao noso centro, acompañados dos seus pais, nais ou avós, para gozar das súas primeiras experiencias cos contacontos. As prazas, temos que decilo, se completaron de seguida.

Cris cantando e Xabi tocando instrumentos

Entre risas, fascinación polos libros, emoción e ata algún choro, os cativos e cativas gozaron da experiencia de sentir os contos de preto e en directo, da man de dous contadores de excepción. Cris de Caldas e Xabi do Camiño, contando e tocando música, fixeron as delicias dun público esixente, rebuldeiro, entusiasta e agradecido a un tempo. 

Grazas aos nosos fantásticos contadores desta tarde, por facernos vivir esta emoción cos cativos e por achegarlles a tradición da nosa literatura oral aos maiores, para que podan transmitila.

Cris de Caldas xunto a Xabi do Camiño, e a Leolo,
felicitando ás bibliotecas polo seu 50 aniversario

A nova recollida en Atlántico Diario